Zum Seiteninhalt

L'agricultura e l'economia forestala dovran infrastructuras segiras

  • Erste Mitteilung
  • Neuen Beitrag einfügen
Il Grischun è quest onn l'ospitant da la dieta internaziunala d'infrastructura. Proxima gievgia e proxim venderdi sa scuntran experts da la Germania, da l'Austria e da la Svizra per barattar infurmaziuns ed experientschas. La finamira da la dieta è quella da promover il contact en il sectur dal svilup rural, da la construcziun da vias e dal guaud.

Cun in program multifar da referats e d'excursiuns specificas vul l'uffizi d'agricultura e da geoinfurmaziun (UAG) mussar – en cooperaziun cun l'uffizi da guaud e privels da la natira (UGP) – als visitaders l'impurtanza d'infrastructuras segiras per la populaziun dal territori alpin. Privels da la natira accumpognan ils umans e lur ovras dapi la colonisaziun dal territori alpin. Lavinas, crudadas da crappa, auas grondas e bovas na pericliteschan betg mo il corp e la vita, mabain er las infrastructuras da basa dal territori rural. Perquai vegn preschentà il management integral da privels da la natira dal chantun. Ultra da quai vegnan preschentads instruments ch'èn da gronda impurtanza per in tractament conscienzius dal terren cultivà e per l'ulteriur svilup dal territori rural.

Barat duraivel
La dieta porscha a persunas interessadas conturns adattads per barattar ideas. Quest barat duai esser in impuls per sviluppar il territori rural sco er per construir e per mantegnair stabiliments d'infrastructura agriculs e forestals. Gia l'onn 1963 ha gì lieu a Salzburg l'emprima dieta internaziunala d'infrastructura sco "dieta trinaziunala da construcziun da vias". Alura è l'occurrenza vegnida organisada l'emprim mintga onn, alura en in ritmus da dus onns ed a partir dals onns 1980 en in interval da trais onns.

La Val dal Rain da Cuira sco lieu da l'occurrenza
A l'ultima dieta l'onn 2014 ad Eisenstadt en l'Austria è l'organisaziun da la proxima dieta d'infrastructura vegnida surdada a la delegaziun svizra. Sin dumonda da l'uffizi federal d'agricultura è il UAG sa declerà pront da surpigliar tala. Sco lieu da l'occurrenza è vegnida tschernida la Val dal Rain da Cuira. La dieta cumenza gievgia cun differents referats a Cuira e vegn cuntinuada il venderdi cun excursiuns interessantas. L'exprima excursiun ha lieu a Trimmis, là stat en il focus il spustament da la via naziunala A13. Tar la segunda excursiun vai per la construcziun pratica d'ina via champestra a Mastrils. La terza excursiun tematisescha las sbuvadas e las bovas da la Val Parghera a Domat.

Las collavuraturas ed ils collavuraturs da las medias èn libers da sa participar als singuls puncts dal program. Els vegnan supplitgads d'annunziar al UAG in'eventuala participaziun (tel. 081 257 24 32, e-Mail Infrastrukturtagung@alg.gr.ch).

Agiunta:
program dal di


Infurmaziuns:
Daniel Buschauer, manader da l'uffizi d'agricultura e da geoinfurmaziun, tel. 081 257 24 31, e-mail Daniel.Buschauer@alg.gr.ch


Gremi: uffizi d'agricultura e da geoinfurmaziun
Funtauna: rg uffizi d'agricultura e da geoinfurmaziun
Neuer Artikel