Zum Seiteninhalt

Communicaziun da la regenza dals 26 d'october 2017

  • Erste Mitteilung
  • Neuen Beitrag einfügen
La regenza ha prendì posiziun tar la revisiun federala da la scolaziun dad ir cun auto. Plinavant ha ella approvà il plan directiv Engiadina bassa/Val Müstair ed ha concedì ina contribuziun chantunala per l'integraziun da "La Voce del San Bernardino" en la gasetta emnila "Il Grigione Italiano".

La regenza s'exprima davart la scolaziun da manischar repassada
La regenza ha prendì posiziun tar la revisiun da las prescripziuns federalas davart il permiss da manischar. La finamira dal pachet da revisiun tar la scolaziun dad ir cun auto è quella che manischunzas novas e manischunzs novs han en il futur dapli pratica da manischar. Ultra da la meglieraziun qualitativa èn planisadas simplificaziuns administrativas. Plinavant duai l'entira scolaziun daventar pli favuraivla per las automobilistas ed ils automobilists.
La regenza beneventa da princip la revisiun da las prescripziuns davart il permiss da manischar. Ella è d'accord ch'il permiss per emprender a manischar da la categoria B po vegnir concedì a partir dal 17. anniversari. Quai è acceptabel, perquai ch'ins dastga emprender a manischar mo en accumpagnament.
En differents puncts promova la regenza dentant adattaziuns u cumplettaziuns. Las lecziuns individualas obligatoricas planisadas, nua ch'i vegn emprendì da far correctamain ina franada totala u da manischar en moda energeticamain effizienta, classifitgescha la regenza sco nunnecessarias. Tuts dus temas fan gia oz part da l'examen pratic da manischar, uschia che questa scolaziun elementara chaschunass mo lavur administrativa sproporziunada. Plinavant è la regenza da l'avis che, tgi che fa l'examen da manischar en in auto cun mecanissem automatic, duai er vinavant dastgar manischar mo autos correspundents. Tgi che manischescha in auto cun mecanissem manual senza exercizi, surpiglia ina ristga pli gronda ch'ina persuna cun exercizi.

Link: Consultaziuns DATEC

Il plan directiv Engiadina bassa/Val Müstair vegn adattà en ils secturs turissem e cuntrada
La regenza ha approvà l'adattaziun e la cumplettaziun dal plan directiv regiunal "2013/14", concludidas ils 20 da schaner 2017 da la regiun Engiadina bassa/Val Müstair. Plinavant ha ella concludì l'actualisaziun e l'adattaziun correspundenta en il plan directiv chantunal.
Il plan directiv regiunal vegn repassà principalmain en ils secturs tematics "turissem" e "cuntrada". Cun l'adattaziun dal plan directiv qua avant maun duain vegnir stgaffidas las premissas per extender il territori da skis Scuol Motta Naluns en las regiuns pli autas. Percunter vegnan relaschads gronds areals or da la regiun da recreaziun intensiva en las regiuns pli bassas. Quest transferiment correspunda a la strategia da svilup da las telefericas per segirar la cumpetitivitad a lunga vista. La dumonda, sche l'extensiun planisada periclitescha la selvaschina, è vegnida sclerida ed examinada detagliadamain en il rom d'ina expertisa biologica pertutgant la selvaschina. Sco mesira centrala vegn fixà in grond territori da paus per la selvaschina en il plan directiv regiunal. Er il territori da skis da Samignun duai vegnir optimà en etappas cun l'adattaziun dal plan directiv qua avant maun. Planisada è l'extensiun dal territori da skis Ravaischer Salaas cun dus novs runals sco er cun la construcziun d'in implant cun funcziun d'apport da Samignun Vitg al Salaaserkopf e d'in ulteriur implant cun funcziun d'apport da Samignun Laret/Compatsch a Muller. Sco preorientaziun è vegnida integrada en il plan directiv regiunal er ina colliaziun dals territoris da skis tranter Motta Naluns (Scuol) e Samignun/Ischgl. Da questa preorientaziun ha la regenza prendì enconuschientscha senza vigur lianta per las autoritads chantunalas.
En il sectur tematic "cuntrada" vegn extendì oravant tut il territori per la protecziun da la cuntrada al sidost da Zernez tranter il Spöl e la via dal pass dal Fuorn.

Or da "La Voce del San Bernardino" ed "Il Grigione Italiano" datti ina gasetta
Per integrar "La Voce del San Bernardino" en la gasetta emnila "Il Grigione Italiano" conceda la regenza ina contribuziun unica da 50 000 francs.
"La Voce dal San Bernardino" è actualmain la suletta gasetta emnila taliana per la Val Mesauc e la Val Calanca. Oz ha la gasetta memia paucas abunentas ed abunents per ademplir las prescripziuns fixadas da la confederaziun per la reducziun dals custs da spediziun. Perquai ha la stamparia Rezzonico Editore SA, Locarno, decidì da desdir il contract cun "Amici della Voce del San Bernardino" per la fin d'october 2017. La consequenza fiss quella che la gasetta emnila stuess smetter sia lavur a partir da questa data.
"La Voce del San Bernardino" duai ussa vegnir integrada en la gasetta emnila "Il Grigione Italiano". "Il Grigione Italiano" è la gasetta emnila taliana la pli derasada en il Grischun; ella vegn legida cunzunt en la Val Puschlav ed en la Val Bregaglia. Actualmain dumbra l'ediziun da "Il Grigione Italiano" circa 3000 exemplars e correspunda pia a las prescripziuns federalas per in sustegn finanzial indirect. Tras la fusiun planisada vegniss cuvrida da nov tut la part taliana dal Grischun cun ina gasetta. En la Val Mesauc duai vegnir mantegnida in'atgna redacziun che s'occupa vinavant da temas da questa regiun. Ultra da quai duai il titel "La Voce del San Bernardino" vegnir manà vinavant independentamain entaifer l'ediziun da "Il Grigione Italiano".

Il guaud da protecziun a Mesauc vegn replantà suenter l'incendi
La regenza ha approvà il project "Ripristino incendio Mesocco – Soazza 2016/2017" da la vischnanca da Mesauc e garantescha ina contribuziun da maximalmain 2 400 000 francs.
Ils 27 da december 2016 è capità in incendi da guaud tranter Mesauc e Soazza. Ils donns ils pli gronds ha l'incendi chaschunà en ils guauds da coniferas sur circa 1000 m s.m. Pervia dal fieu da tschimas intensiv èn ars passa 70 pertschient dals bostgs. Blers dals bostgs donnegiads èn vegnids tatgads ultra da quai la primavaira dal bau-scorsa. Sco mesira d'urgenza èn perquai directamain suenter l'incendi vegnids pinads e per gronda part transportads davent ils pigns pirids ed ils pigns tatgads dal bau-scorsa. Quai cun la finamira d'impedir uschè bain sco pussaivel la derasaziun dal bau-scorsa sin ils bostgs vischins. Tras il donn considerabel n'è la funcziun da protecziun betg pli garantida en grondas parts da la surfatscha ch'è stada pertutgada da l'incendi da guaud sco er da guauds vischins. Perquai èn necessarias mesiras da replantaziun voluminusas.
Il project qua avant maun ha l'intent da restabilir e da mantegnair la funcziun da protecziun en il territori da l'incendi da guaud ed en ils guauds cunfinants resp. d'evitar uschè bain sco pussaivel donns consecutivs tras il bau-scorsa. Ultra da quai duai la via da guaud che ha patì fermamain durant il transport da las grondas quantitads da laina sin basa da l'utilisaziun sfurzada, vegnir restabilida e per part renovada. Plinavant duai vegnir eliminada la mancanza d'indrizs da stizzar fieu preventivas per incendis da guaud sin il territori communal da Mesauc.

-

Ils rempars a la riva dal Rain alpin a Fläsch vegnan sanads
La regenza ha approvà in project per construir rempars al Rain alpin a Fläsch cun resalva da las permissiuns correspundentas dal chantun Son Gagl. La confederaziun ed il chantun sa participeschan a la finanziaziun cun contribuziuns per la correcziun dals curs d'aua. La contribuziun federala importa circa 210 000 francs e la contribuziun chantunala dal Grischun 120 000 francs.
Il Rain alpin vegn stabilisà a Fläsch cun ina rampa existenta da blocs da crappa. La rampa furma in "stgalim" artifizial ed è in punct fix altimetric local en il letg dal flum. Ella gida uschia ad evitar ch'ils rempars a l'ur dal Rain alpin vegnian schlavads. A medem temp impedescha ella ch'il nivel da l'aua sutterrana en la planira da la Val dal Rain vischina sa sbassa. En il rom da las controllas regularas dals rempars èsi sa mussà che la traversa sto vegnir sanada. Pervia da la chargia permanenta da l'aua currenta en il flum è la rampa sa sbassada cuntinuadamain. Dapi l'onn 2003 è ella sbassada per var 1,2 meters. Perquai è periclitada la stabilitad dals rempars a l'ur dal flum. Gia che l'ovra sa chatta tant sin il territori dal chantun Grischun (vischnanca da Fläsch) sco er sin il territori dal chantun Son Gagl (vischnancas da Mels e da Sargans) han il chantun Son Gagl (represchentà tras l'interpresa "Rheinunternehmen") e la vischnanca da Fläsch elavurà cuminaivlamain in project da sanaziun. Il project cuntegna oravant tut la reparaziun da la traversa existenta cun integrar ulteriurs blocs da crappa.

-
Stadi actual da la traversa al Ellhorn a Sargans
©Daniel Dietsche, Rheinunternehmen Son Gagl


Gremi: regenza
Funtauna: rg chanzlia chantunala dal Grischun
Neuer Artikel