Zum Seiteninhalt

Communicaziun da la regenza dals 2 da november 2017

  • Erste Mitteilung
  • Neuen Beitrag einfügen
La regenza ha renconuschì ed approvà la scolina bilingua a Cuira. Ultra da quai ha ella concedì ina contribuziun chantunala per engrondir il vitg da Heidi a Maiavilla ed ha permess da dischlocar in manaschi da chavals a Silvaplauna.

Da nov contribuziuns chantunalas er per la scolina bilingua a Cuira
La regenza ha renconuschì ed approvà las partiziuns bilinguas da la scolina da la citad da Cuira. Dapi l'onn da scola 2010/11 maina la scola da la citad da Cuira partiziuns bilinguas da la scolina en tudestg e rumantsch sco er en tudestg e talian. Fin ussa n'avevan quellas dentant nagin dretg da contribuziuns, perquai ch'ellas n'eran betg cuntegnidas en il conclus da la regenza dals 5 da matg 2009 concernent "classas bilinguas sin il stgalim primar da la scola da la citad da Cuira". Per quest motiv ha la scola da la citad da Cuira dumandà la regenza da cumplettar retroactivamain quest conclus per l'onn da scola 2016/17. Cun l'approvaziun actuala da las partiziuns bilinguas da la scolina survegn la scola da la citad da Cuira – retroactivamain per l'onn da scola 2016/17 – 12 042 francs per 58 scolaras e scolars. Per l'onn da scola 2017/18 importan las contribuziuns a la citad da Cuira previsiblamain 20 064 francs per 76 scolaras e scolars da la scolina.

Engrondiment cumplessiv dal vitg da Heidi a Maiavilla
La regenza ha concedì a la Heididorf SA a Maiavilla ina contribuziun da 2 milliuns francs per engrondir il vitg da Heidi, cun resalva che la finanziaziun totala saja reglada e che tut las permissiuns da construcziun e da manaschi necessarias sajan avant maun. Per augmentar l'attractivitad da la purschida turistica en il vitg da Heidi duai quel vegnir engrondì en moda cumplessiva. En quest connex metta la Heididorf SA gronda paisa sin il mantegniment da l'autenticitad dal vitg.
Ils custs totals da quest project importan circa 10,1 milliuns francs. Qua tras duain vegnir renovadas las attracziuns existentas e vegnir stgaffids ulteriurs puncts d'attracziun. Latiers tutgan la chamona d'alp da Heidi, la scola dal vitg en la chasa municipala, l'uigl da chauras da Peter, la cuschina da la tatta, Heidi e Klara en il Grischun, il mund d'aventuras da Heidi sco er la plazza da giugar da Heidi. Las regiuns Landquart, Plessur e Plaun, la citad da Maiavilla sco er il chantun Grischun attribueschan en plirs reguards ina impurtanza particulara al vitg da Heidi e classifitgeschan quest vitg sco infrastructura relevanta per il sistem. Uschia po vegnir accelerada la realisaziun da quest project cun attracziun chantunala e vegnir rinforzà il sistem turistic regiunal.

-
Chamona d'alp da Heidi © Heididorf Maienfeld

Glisch verda per renovar l'ovra electrica Hüscherabach e per construir la nova ovra electrica Stutzbach a Spleia
La regenza ha acceptà la dumonda d'approvaziun da la concessiun e dal project per renovar l'ovra electrica Hüscherabach e per construir la nova ovra electrica Stutzbach. Ultra da quai ha ella approvà la concessiun dal dretg da las auas per utilisar la forza idraulica dal Hüscherabach e dal Stutzbach che la vischnanca da Spleia aveva dà a la Wasserkraftwerk Hüscherabach SA (en fundaziun).
La Wasserkraftwerk Hüscherabach SA (en fundaziun) ha l'intenziun da trair a niz la forza idraulica dal Hüscherabach e dal Stutzbach per producir electricitad. En l'ovra electrica Hüscherabach èsi previs da producir en media 6,1 uras da gigawatt per onn ed en l'ovra electrica Stutzbach en media 4,05 uras da gigawatt per onn.

PDF: visualisaziuns graficas

Midada da zona per dischlocar in manaschi da chavals a Silvaplauna
La regenza ha approvà la revisiun parziala da la planisaziun locala da la vischnanca da Silvaplauna, concludida ils 9 da mars 2016.
En il territori da "Üerts" duai ina parcella da var 2,2 hectaras vegnir transferida da la zona d'agricultura a la zona per sport da chavals. Questa enzonaziun stat en connex cun la dischlocaziun planisada dal manaschi da chavals da la Hossmann Stallungen SA che sa chatta oz amez la zona d'abitar 1. Pervia da las relaziuns stretgas n'è il lieu actual dal manaschi da chavals betg optimal. Quai tant per il gestiunari dal manaschi da chavals sco er per las vischinas ed ils vischins. La regenza sustegna perquai il nov lieu planisà ed ha approvà la revisiun parziala da la lescha da construcziun per la midada da zona. Il plan general da furmaziun 1:2000 "Manaschis da chavals Champfèr" na vegn percunter betg approvà e vegn returnà a la vischnanca da Silvaplauna per al repassar. En connex cun quest repassament ston vegnir redimensiunads tant ils edifizis previs sco er la surfatscha planisada per ils stabiliments al liber.

-
© Comet Photoshopping ScRL / Dieter Enz


Gremi: regenza
Funtauna: rg chanzlia chantunala dal Grischun
Neuer Artikel