Navigation

Inhaltsbereich

  • Erste Mitteilung
  • Neuen Beitrag einfügen
101 mattas da tut il chantun sa participeschan al 3. parlament grischun da mattas. Er circa 20 scolaras dal Grischun talian vegn ad esser preschentas. Per in di midan ellas a la rolla d'ina parlamentara.

En il rom dal di naziunal da l'avegnir organisescha il post da stab per l'egualitad da las schanzas dal chantun Grischun ils 9 da november 2017 il 3. parlament grischun da mattas. Quest parlament dat puspè la schanza a las mattas da prender invista da la lavur parlamentara e quai concretamain. Ellas sesan sezzas en la sala dal cussegl grond, s'occupan da dumondas politicas, elavuran propostas e fan debattas.

101 mattas da tut il chantun èn s'annunziadas. Fitg legraivel è il fatg che er circa 20 mattas dal Grischun talian vegnan a sa participar.
L'avantmezdi discutan las participantas en cumissiuns mintgamai in tema ed elavuran ensemen e cun il sustegn da commembras e commembers dal cussegl grond propostas per pretensiuns concretas. Ils temas èn protecziun da l'ambient/dal clima, egualitad tranter um e dunna, mobing, plazzas da lavur e fugitivs/migraziun.

Davart las propostas vegni debattà il suentermezdi en il plenum en la sala dal cussegl grond sut la direcziun da deputada Vera Stiffler e votà. A la fin dal parlament da mattas duain vegnir surdadas al cussegl grond las propostas en furma da petiziuns.

Collavuraturas e collavuraturs da las medias sco er persunas interessadas èn envidadas cordialmain d'observar la debatta il suentermezdi. Las sedutas da las cumissiuns n'èn betg avertas al public.


Program:

09:45 cumenzament, bainvegni
10:15 sesida da cumissiun I
11:30 pausa da mezdi
12:40 sesida da cumissiun II
14:00 debatta en la sala dal cussegl grond
16:30 fin


Infurmaziuns:
Tamara Gianera, manadra dal post da stab per l'egualitad da las schanzas, tel. 081 257 35 71, e-mail: Tamara.Gianera@stagl.gr.ch


Gremi: post da stab per l'egualitad da las schanzas
Funtauna: rg post da stab per l'egualitad da las schanzas
Neuer Artikel