Dapi 81 onns èsi pussaivel – grazia al succurs svizzer d'enviern – da sustegnair durant tut l'onn umans che vivan en il Grischun ed en tut la Svizra sin il cunfin a la povradad. L'onn passà han er en il Grischun vers 250 persunas basegnusas stuì dumandar l'agid da l'organisaziun. Sut la direcziun dal president central ed anteriur cusseglier federal Samuel Schmid ha dacurt gì lieu a Cuira la radunanza da delegadas e delegads dal succurs svizzer d'enviern.

La povradad n'è betg adina evidenta. En Svizra valan quellas persunas sco povras che han memia paucs meds finanzials per pudair manar ina vita integrada socialmain. Latiers tutgan en tut la Svizra 27 000 persunas ch'èn vegnidas sustegnidas l'onn passà dal succurs svizzer d'enviern.

L'agid naziunal è dumandà fitg
Er tar il succurs d'enviern dal Grischun vegnan elavuradas onn per onn lunsch sur 200 dumondas da sustegn. La presidenta da la regenza Barbara Janom Steiner, commembra dal cussegl da la fundaziun succurs d'enviern dal Grischun, è persvasa che gia ina pitschna contribuziun finanziala d'in pèr tschient francs po stgaffir avunda spazi d'agir per ina famiglia u per ina persuna che viva suletta, uschia ch'ella po puspè dumagnar ses mintgadi en moda autonoma e senza quitads finanzials. Circa dus terzs da las dumondas da sustegn en il Grischun pertutgan famiglias u persunas ch'educheschan sulettas e lur uffants.

Il succurs d'enviern dovra vinavant sustegn
Il succurs svizzer d'enviern sustegna ils succurs chantunals d'enviern cun servetschs sco er cun contribuziuns finanzialas, ma er materialas. Uschia ha il succurs d'enviern dal Grischun pudì sa participar l'onn da gestiun passà per exempel a la finanziaziun d'ina correctura dals dents d'in uffant, ha equipà ina famiglia giuvna cun in letg d'uffants u ha regalà ad in scolar da l'emprima classa in turnister da scola. La solidaritad da la populaziun en furma da donaziuns al succurs d'enviern sa chatta vinavant sin in bun nivel. En tut la Svizra èn vegnidas fatgas l'onn passà donaziuns da var 2,8 milliuns francs.

Fotografia:

Da sanestra: Monika Stämpfli, la gestiunaria dal succurs svizzer d'enviern, la presidenta da la regenza Barbara Janom Steiner e l'anteriur cusseglier federal Samuel Schmid.


Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch


Gremi: departament da finanzas e vischnancas
Funtauna: rg departament da finanzas e vischnancas