Per incumbensa dal cussegl grond ha la regenza inoltrà ina iniziativa dal chantun a favur da l'amplificaziun dal corp da guardias da cunfin. Ultra da quai ha ella approvà in project per construir rempars a la Plessur e prenda mesiras per reducir las ristgas en cas da catastrofas e da situaziuns d'urgenza.
Il corp da guardias da cunfin duai vegnir amplifitgà
Il chantun Grischun ha inoltrà a la confederaziun ina iniziativa dal chantun concernent l'amplificaziun dal corp da guardias da cunfin. Cun quai ha la regenza realisà ina incumbensa dal cussegl grond ch'è vegnida inoltrada en la sessiun d'avrigl 2017 ed acceptada en la sessiun da zercladur 2017.
L'iniziativa dal chantun pretenda ch'il persunal da guardias da cunfin vegnia dotà en tut ils lieus uschia, ch'el po ademplir sias incumbensas a norma da la situaziun da segirezza mintgamai existenta e confurm als basegns da segirezza da la populaziun. Ultra da quai na sto il persunal da guardias da cunfin betg vegnir reducì, mabain augmentà e survegnir in equipament ed ina infrastructura materialmain moderna. Uschia duai vegnir garantì ch'il corp da guardias da cunfin possia surpigliar cuntentaivlamain oz ed en il futur las sfidas pli e pli grondas en il sectur da las incumbensas da duana e da segirezza sco er da la migraziun illegala.
Incumbensa Hitz-Rusch concernent l'amplificaziun dal corp da guardias da cunfin
Cuira sanescha ils rempars da la Plessur
La regenza ha approvà cun intginas cundiziuns il project da la citad da Cuira per construir rempars a la Plessur. Ils rempars existents da la Plessur han subì donns en differents lieus. Igl è previs da realisar las mesiras correspundentamain a lur urgenza en trais etappas da project. Il project qua avant maun cumpiglia l'emprima etappa als lieus sut la Ringstrasse, sur il Kettbrüggli e sut la punt Sassal. A quests trais lieus sto mintgamai vegnir reparada ina traversa da betun. Las traversas che han subì donns vegnan concepidas da nov sco "rampas da blocs da crap". Entant che – tar las traversas – l'aua croda sur in ur giz, superescha l'aua currenta – tar las rampas – la differenza d'autezza sur in plaun levamain inclinà. Tecnicamain persequiteschan questas duas modas da construcziun il medem intent, ma las rampas han l'avantatg ch'ils peschs pon nudar si per il flum (accessibladad dals peschs).
Tenor la cunvegna da program "ovras da protecziun cunter l'aua" sa participeschan la confederaziun ed il chantun finanzialmain als custs da quests rempars. Dals custs da totalmain 1,45 milliuns francs surpiglia la confederaziun maximalmain 507 500 francs. Il chantun paja – tenor la lescha davart la correcziun dals curs d'aua – ina contribuziun da maximalmain 290 000 francs. Supplementarmain sa participescha il chantun cun ina contribuziun per la construcziun da vias da maximalmain 65 250 francs.
Reducziun da las ristgas en cas da catastrofas e da situaziuns d'urgenza en il Grischun
L'onn 2013 ha la regenza incumbensà l'uffizi da militar e da protecziun civila d'elavurar ina planisaziun da mesiras sin basa da las ristgas en il sectur da catastrofas e da situaziuns d'urgenza per il chantun Grischun. En in'emprima fasa dal project è in vast spectrum da periclitaziuns natiralas, socialas e tecnicas vegnì analisà areguard las ristgas per il chantun. En il center da la segunda fasa è stà il giudicament da la situaziun actuala da la protecziun da la populaziun dal Grischun e l'elavuraziun da mesiras per reducir las ristgas. L'attenziun principala è vegnida dada en quest connex a las interfatschas existentas tranter las differentas organisaziuns ed incumbensas.
En la terza fasa ha la regenza prendì ussa la decisiun, tge mesiras che vegnan realisadas per reducir las ristgas e tge ristgas che ston vegnir prendidas en cumpra, sche las mesiras respectivas na vegnan betg realisadas. Dudesch mesiras èn tant enavant madiras per ch'ina realisaziun possia vegnir concludida, bain cun resalva da las resursas da persunal necessarias. Ils custs d'investiziun per la realisaziun da questas mesiras muntan a circa 1,6 milliuns francs, ils custs periodics annuals a circa 300 000 francs. Per quatter ulteriuras mesiras ha la regenza prendì ina decisiun da princip. Per quest intent ston ils posts da servetsch responsabels bainbaud elavurar ils detagls correspundents.
Gremi: regenza
Funtauna: rg chanzlia chantunala dal Grischun