Cuntegn da la pagina

Incumbensa Hitz-Rusch concernent l'amplificaziun dal corp da guardias da cunfin (iniziativa dals chantuns)

sessiun: 19.04.2017

Sper ils organs da segirezza en ils chantuns ha il corp federal da guardias da cunfin (Cgcf) ina rolla impurtanta en il cumbat cunter il turissem criminal sco er cunter la migraziun illegala e gida uschia a garantir la segirezza en Svizra. Tras quai che l'immigraziun illegala è s'augmentada massivamain ils ultims onns, arrivan las collavuraturas ed ils collavuraturs dal Cgcf en la gronda part da las regiuns da la Svizra als limits da lur abilitad da supportar squitsch.

Las finanzas federalas quintan ils proxims onns cun in aut deficit structural. Tras il program da stabilisaziun 2017-2019 resultan respargns da 60 milliuns francs per onn, uschia ch'i vegnan stritgadas var 500 fin 700 plazzas entaifer 2 onns. Las mesiras tar il persunal federal vegnan per regla realisadas en moda lineara tras ils departaments. Cun gronda probabilitad sto ina part dals respargns vegnir realisada en il sectur da la segirezza interna. Uschia arriva il Cgcf en il focus d'ina reducziun da persunal. Quai en in mument, nua ch'ils moviments da migraziun nà dal sid s'augmentan, nua che la situaziun en il Proxim Orient è fragila, nua che attentats terroristics daventan chaussas normalas, nua che la criminalitad transcunfinala na sa reducescha betg e nua ch'il basegn da segirezza tar la populaziun crescha.

Decisiv èsi ussa dentant ch'i na dettia betg ulteriuras reducziuns tar il Cgcf, mabain ch'i stettian a disposiziun novas plazzas al Cgcf per las incumbensas centralas d'enfin ussa, resguardond il fatg che las ristgas creschan e che la situaziun sa mida permanentamain. En il senn da la protecziun dals cunfins e da la segirezza da noss pajais fissi perquai malprecaut da desister d'ina ulteriura amplificaziun, ed i pudessan resultar fitg svelt situaziuns precaras. Visavi respargns tar il Cgcf pon svelt star auts custs consecutivs en il sectur da la migraziun.

Gia ils ultims 2 onns è il persunal d'intginas regiuns adina puspè vegnì spustà temporarmain en ina regiun pertutgada anc pli acutamain. Quai è bain chapaivel en il senn d'ina planisaziun pli effizienta da las acziuns, ma chaschuna a medem temp novas largias, sco p.ex. en il chantun Grischun.

Ord vista grischuna pretendain nus che las circumstanzas geograficas (p.ex. las pretensiuns particularas envers in dispositiv decentral en in chantun da muntogna) vegnian resguardadas adequatamain tar l'attribuziun da las resursas.

Sa basond sin l'art. 160 da la constituziun federala e sin l'art. 59 al. 1 da la constituziun dal chantun Grischun (CC; DG 110.100) vegn la regenza dal chantun Grischun perquai incumbensada:

- d'inoltrar a l'assamblea federala ina iniziativa dals chantuns, tenor la quala las autoritads federalas vegnan supplitgadas urgentamain da dotar il persunal dal Cgcf en tut ils lieus uschia, ch'el po ademplir sias incumbensas a norma da la situaziun da segirezza mintgamai existenta e confurm als basegns da segirezza da la populaziun;

- da betg reducir il persunal dal Cgcf, mabain d'augmentar ses persunal, al dond in equipament ed ina infrastructura materialmain moderna, per ch'il Cgcf possia ademplir oz ed en l'avegnir en moda cuntentaivla las sfidas creschentas en il sectur da sias incumbensas da duana e da segirezza sco er da la migraziun illegala.

Cuira, ils 19 d'avrigl 2017

Hitz-Rusch, Della Vedova, Lamprecht, Albertin, Alig, Atanes, Berther (Mustér), Bleiker, Blumenthal, Bondolfi, Brandenburger, Buchli-Mannhart, Burkhardt, Caduff, Caluori, Casanova (Glion), Casanova-Maron (Domat), Casty, Cavegn, Caviezel (Tavau Clavadel), Clalüna, Claus, Crameri, Danuser, Davaz, Dermont, Dosch, Dudli, Engler, Epp, Fasani, Felix (Haldenstein), Felix (Scuol), Florin-Caluori, Foffa, Giacomelli, Gunzinger, Hardegger, Heinz, Heiz, Hug, Jeker, Jenny, Kasper, Koch (Tumein), Koch (Igis), Kollegger, Komminoth-Elmer, Kunfermann, Kunz (Fläsch), Lorez-Meuli, Mani-Heldstab, Märchy-Caduff, Marti, Mathis, Michael (Donat), Michael (Castasegna), Monigatti, Müller, Nay, Niederer, Niggli (Samedan), Niggli-Mathis (Grüsch), Noi-Togni, Papa, Paterlini, Pedrini, Salis, Sax, Schneider, Schutz, Steck-Rauch, Stiffler (Tavau Plaz), Stiffler (Cuira), Thomann-Frank, Tomaschett (Breil), Tomaschett-Berther (Trun), Toutsch, Valär, Vetsch (Claustra Vitg), Waidacher, Weber, Weidmann, Widmer-Spreiter, Wieland, Berther (Segnas), Cantieni, Erhard, Gugelmann, Hartmann-Conrad (Schiers), Lombardi, Natter, Pfister

Resposta da la regenza

I. Introducziun
La collavuraziun cun il corp da guardias da cunfin (Cgcf) è elementara per il chantun Grischun, sco gia explitgà en la resposta da la regenza a l'incumbensa Lamprecht concernent la dotaziun dal corp da guardias da cunfin al traject grischun dal cunfin svizzer (conclus da la regenza dals 28 da favrer 2017, prot. nr. 161). La garanzia da la segirezza è ina da las incumbensas centralas las pli impurtantas d'in stadi. Ils privels ed ils ristgs actuals e futurs en ils secturs da la criminalitad transcunfinala, da la migraziun irregulara e dal privel latent da terror pon vegnir schliads mo en moda colleghiala ensemen cun il Cgcf. L'ambient da segirezza vegn a restar ina sfida il proxim temp. Uschia mussan las cifras ch'il Cgcf ha registrà l'onn 2016 passa 17 000 dimoras illegalas ed ha exequì quatter giadas dapli spedidas che l'onn precedent. Il chantun Grischun è dependent dal fatg ch'il Cgcf restia in ferm partenari e che ses effectiv e ses meds bastian per dumagnar las sfidas che resultan. En il chantun Grischun è la collavuraziun cun il Cgcf vegnida extendida e concepida en moda pli efficazia ils onns passads. A medem temp ha il chantun Grischun, sco auters chantuns er, pretendì da la confederaziun d'amplifitgar il Cgcf. La regenza ed il departament cumpetent s'engaschan cuntinuadamain ed activamain per in ferm Cgcf tar la confederaziun. En quest connex stat il schef dal departament cumpetent en stretg contact cun las persunas ch'èn responsablas per il Cgcf en reguard politic ed operativ.

II. Svilup dals ultims onns
Sin fundament da l'ambient da segirezza han ils chantuns Basilea-Citad e Basilea-Champagna inoltrà gia l'onn 2015 iniziativas dals chantuns per amplifitgar il Cgcf. En consequenza d'ina da questas iniziativas dals chantuns ha la cumissiun dal cussegl naziunal per la politica da segirezza incumbensà il cussegl federal tranter auter d'examinar l'effectiv dal Cgcf. Il cussegl federal ha lura preschentà ils 25 da matg 2016 il rapport "Rolla ed effectiv futur dal corp da guardias da cunfin". Er en il rapport èsi incontestà che l'ambient da segirezza resta ina sfida. Problematicas èn dentant las cundiziuns generalas finanzialas da la confederaziun. Betg sco ultim pervia da quai ha l'amplificaziun dal Cgcf, ch'è necessaria ord vista dals chantuns, fatg naufragi il december 2016 en il parlament, uschia ch'il chantun Son Gagl ha concludì l'avrigl 2017 d'inoltrar ina iniziativa dals chantuns ch'è praticamain identica cun l'incumbensa qua avant maun.

III. Tar las finamiras da l'incumbensa
Tuttas duas finamiras da l'incumbensa han ils chantuns exprimì repetidamain envers la confederaziun. Ina realisaziun vegn dentant impedida pervia da las cundiziuns generalas finanzialas da la confederaziun. Tenor l'avis da la regenza sto il Cgcf vegnir amplifitgà malgrà las finanzas federalas precaras e vegnir dotà cun ils meds necessaris, per ch'el possia ademplir sia incarica. Mo uschia po l'incumbensa statala centrala da la garanzia da la segirezza vegnir ademplida en moda cunvegnenta. Affirmada vegn la regenza tranter auter er tras las propostas dal schef dal departament federal da finanzas per distgargiar il Cgcf, numnadamain d'engaschar 40 fin 50 militars professiunals (commembers da la polizia militara) per sustegnair il Cgcf u da delegar tschertas incumbensas a persunas da segirezza privatas. Necessaria è in'amplificaziun dal Cgcf en l'entira Svizra per meglierar sia forza e sia effizienza. Quai pretenda ulteriuras resursas e signifitga er ina preparaziun pli lunga, è dentant indispensabel per la segirezza al cunfin.

La regenza è pronta d'acceptar l'incumbensa d'inoltrar ina iniziativa dal chantun en il senn da las explicaziuns qua survart.

28 da zercladur 2017