Tge signifitga la midada digitala per Vus, per il chantun Grischun e per Voss mintgadi? Co che la digitalisaziun influenzescha gia oz Vossa vita e tge ch'As spetga damaun, pudais Vus scuvrir ils 21 da november a la staziun d'autos da posta a Cuira u per transmissiun da video directa sin http://graubuenden.digital/.
La digitalisaziun transfurma il mund, en il qual nus vivain, e quai en ina dimensiun ed en in tempo sco anc mai. Al di digital dals 21 da november 2017 mussan interpresas ed instituziuns en tut la Svizra, tge che quai signifitga per nus tuts. In dals partenaris è il chantun Grischun. Per il Grischun è la digitalisaziun ina schanza. Il Grischun sco plazza economica e sco lieu d'abitar vegn a profitar da la digitalisaziun, perquai che las cundiziuns generalas constattan e perquai che interpresas grischunas, la scola auta e las instituziuns da perscrutaziun lavuran cuminaivlamain vi da las innovaziuns da damaun. Il success sa mussa gia oz en bleras interpresas grischunas innovativas dal sectur da l'auta tecnologia.
Progress ha tradiziun
Il Grischun n'acquista betg nov terren cun quai, mabain cuntinuescha cun ina tradiziun. Gia en il passà han il Grischun e sias valladas laschà nascher grondas ideas e bleras interpresas intelligentas che han mussà la via vers l'avegnir. La digitalisaziun sforza las interprendidras ed ils interprendiders da cuntinuar cun questa tradiziun. Per esser pronts per l'avegnir digital dovri las enconuschientschas correspundentas. Las instituziuns da furmaziun intermedieschan gia oz la savida necessaria per che las Grischunas ed ils Grischuns survegnian perspectivas sin il martgà da lavur regiunal.
Digitalisaziun per dapli qualitad da viver
Tras la digitalisaziun survegn il Grischun dapli attractivitad tant sco lieu d'abitar e sco plazza economica sco er sco destinaziun da vacanzas. Noss chantun daventa uschia la metropola natirala da las Alps cun access digitals, che cumbinescha in'auta qualitad da viver cun ina moda da lavurar effizienta e flexibla. Ils 21 da november mussan differentas interpresas ed instituziuns grischunas il stadi da la digitalisaziun dad oz e quel ch'è da spetgar damaun. Sco partenaris han ins pudì obtegnair las interpresas Banca chantunala grischuna, Inventx, Mia Engiadina, Viafier retica, Viafiers federalas svizras e TRUMPF Svizra SA sco er la SATE Cuira. Medialmain vegn l'occurrenza accumpagnada dad RTR e da Somedia.
CEO Digital Challenge sco project persistent
Per ch'il di digital en il Grischun s'effectueschia er suenter ils 21 da november, lantschan ils partenaris participads la CEO Digital Challange a Cuira. Otg CEO d'interpresas grischunas vegnan "serrads" durant in di en in local e dastgan vegnir ora pir, cur ch'els han sviluppà – durant quest temp – ina idea che fa progredir la digitalisaziun en il chantun. Ultra da quai ston ils CEO s'obligar da sustegnair activamain la realisaziun da l'idea.
Ulteriuras infurmaziuns chattais Vus sut
http://graubuenden.digital/.
Puncts culminants dal program:
8.00 fin 20.00 sin la staziun d'autos da posta, Cuira, cun attracziuns ed infurmaziuns davart la digitalisaziun tras ils partenaris participads.
9.30 – Avertura uffiziala dal di digital svizzer a Turitg cun la presidenta da la confederaziun Doris Leuthard. En il rom da l'avertura transmissiun directa sin la staziun d'autos da posta a Cuira tar la presidenta da la regenza Barbara Janom Steiner.
16.00 – Las schanzas da la digitalisaziun per il Grischun, talk cun il cusseglier guvernativ Jon Domenic Parolini e cun il professer da la SATE Peter Moser.
16.25 – Transmissiun directa a Turitg al lieu principal dal di digital, tranter auter cun lantschar la CEO Digital Challenge.
19.30 – Transmissiun directa a Cuira dal concert da James Gruntz en la staziun principala da Turitg.
Infurmaziuns:
Marcus Hassler, secretari dal departament d'economia publica e fatgs socials, tel. 081 257 23 12, e-mail
Marcus.Hassler@dvs.gr.ch
Gremi: departament d'economia publica e fatgs socials
Funtauna: rg departament d'economia publica e fatgs socials