Zum Seiteninhalt

La regenza vul nizzegiar la schanza da l'electromobilitad

  • Erste Mitteilung
  • Neuen Beitrag einfügen
La mobilitad electrica è ina gronda schanza per il chantun Grischun. La regenza vul nizzegiar quella e preschenta in pachet cun mesiras da promoziun.

L'electrificaziun da la mobilitad pussibilitescha da concepir il sectur da traffic en moda pli effizienta areguard l'energia sco er en ina maniera che tegna meglier quint dal clima e da l'ambient. La regenza ha deliberà in pachet da mesiras cun l'intent da promover la derasaziun da l'electromobilitad en tut il chantun. L'accent metta ella sin l'extensiun da l'infrastructura per chargiar vehichels electrics sco er sin la funcziun d'exempel dal chantun.

Augmentar l'effizienza energetica e reducir las immissiuns per l'ambient

Il traffic sin via è oz quasi cumplettamain dependent da purtaders d'energia fossila e responsabel per circa in quart dal consum d'energia. La finamira da la strategia d'energia 2050 da la confederaziun è quella da sbassar il consum d'energia en il traffic augmentond l'effizienza ed a medem temp da reducir las immissiuns per l'ambient. En quest connex ha la mobilitad electrica ina gronda impurtanza. Motors electrics han in grad d'efficacitad pli grond che motors da combustiun convenziunals. Sche vehichels electrics vegnan mess en moviment cun electricitad d'energias regenerablas, vegn reducida la dependenza da carburants fossils e vegnan diminuidas las immissiuns localas da substanzas nuschaivlas en l'aria, da gas cun effect da serra sco er da canera.

Mesiras da promoziun sistematicas
Pervia da sia maschaida d'electricitad cun quasi 100 pertschient funtaunas d'energia regenerabla è il Grischun bunamain predestinà per in'electromobilitad che schanegia l'ambient. La lescha d'energia dal chantun Grischun formulescha cleras finamiras per reducir e per substituir il consum d'energia. Per cumplettar las stentas enconuschentas e cumprovadas en il sectur dals edifizis ha la regenza perquai er en mira da concepir il sectur da traffic en moda pli effizienta areguard l'energia sco er en ina maniera che tegna meglier quint dal clima e da l'ambient.

L'acceptanza da l'electromobilitad crescha en la populaziun sco ch'i mussan enquistas davart las intenziuns da cumpra da la populaziun svizra. Mintga segunda persuna ha da princip ina tenuta positiva envers la cumpra d'in auto electric. Per var 80 pertschient dals cumpraders potenzials pleda però la mancanza da l'infrastructura da chargiar actualmain cunter l'acquisiziun d'in vehichel electric. Perquai ha la regenza l'intenziun da sustegnair cun mesiras da promoziun sistematicas ina derasaziun svelta da la mobilitad electrica en tut il chantun.

Extensiun da l'infrastructura per chargiar vehichels electrics

Ultra d'activitads d'infurmaziun e da cussegliaziun è l'accent dal pachet da mesiras sin l'installaziun da l'infrastructura da chargiar. In dumber confurm al basegn da posts da chargiar plazzads bain, accessibels a la publicitad e simpels d'applitgar renda l'electromobilitad bler pli attractiva e po accelerar la midada dal motor da combustiun al motor electric. Cun il plan da basa "Infrastructura per la mobilitad electrica" deliberà da la regenza vegnan sustegnidas las activitads da provediders d'energia e da persunas privatas per metter a disposiziun infrastructuras per chargiar vehichels electrics. Per dar impuls per extender svelt l'infrastructura per chargiar vehichels electrics e per serrar las largias identifitgadas en la rait dals posts da chargiar duai vegnir promovida finanzialmain l'installaziun da tals posts accessibels a la publicitad per lung da las axas principalas e da las vias chantunalas. Cun la proxima revisiun parziala da la lescha d'energia dal chantun Grischun duai vegnir stgaffida la basa per programs da promoziun correspundents. Gia per l'onn proxim è planisada in'acziun da promoziun limitada en il senn d'ina emprova da pilot.

Il chantun sco exempel
Pervia da sias activitads chaschuna l'administraziun chantunala mobilitad e tras quai traffic. En quest connex vul il chantun occupar ina funcziun d'exempel e concepir quest traffic en moda uschè effizienta ed ecologica sco pussaivel. Perquai ha la regenza decidì d'elavurar e d'introducir in management da mobilitad manaschial cumplessiv per l'administraziun chantunala. Cun metter a disposiziun l'infrastructura da chargiar tar ils edifizis administrativs duai l'electrificaziun dal parc da vehichels chantunals vegnir promovida e stgaffida in purschida per las collavuraturas ed ils collavuraturs sco er per la clientella. Il punct fix sin l'axa da temp per realisar il management da mobilitad è l'inauguraziun da l'edifizi administrativ "sinergia" en circa dus onns.

Agiuntas:
- pachet da mesiras per promover la mobilitad electrica en il Grischun
- plan da basa "Infrastructura per la mobilitad electrica en il Grischun"
- mussavia per las vischnancas davart la mobilitad electrica


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch


Gremi: regenza
Funtauna: rg departament da construcziun, traffic e selvicultura
Neuer Artikel