Zum Seiteninhalt

Confermà Peter A. Fanconi sco president da la banca chantunala grischuna

  • Erste Mitteilung
  • Neuen Beitrag einfügen
La regenza grischuna ha reelegì Peter A. Fanconi sco president da la banca chantunala grischuna (BCG) per la perioda d'uffizi dal 1. d'avrigl 2018 fin ils 31 da mars 2022. Il cusseglier da banca vertent Christian Thöny daventa nov vicepresident da la banca.

Tenor la lescha davart la banca chantunala grischuna (BCG) è la regenza cumpetenta per eleger il cussegl da banca che sa cumpona da set persunas. Ils 31 da mars 2018 finescha la perioda d'uffizi dal president da la banca Peter A. Fanconi. Il giurist da 50 onns è dapi 4 onns president dal cussegl da banca e parsura da la cumissiun strategica. Il spezialist da banca Fanconi è tranter auter president dal cussegl d'administraziun da BlueOrchard SA, ina societad dominanta sin plaun mundial en il sectur da la microfinanza per cumbatter la povradad en pajais da svilup, e vicepresident dal cussegl administrativ da la Deutsche Bank (Svizra) SA. La regenza l'ha confermà per ulteriurs 4 onns sco president da la banca.

Ils 31 da mars 2018 finescha er la perioda d'uffizi dal cusseglier da banca Fabrizio Keller (commember dal cussegl da banca dapi l'onn 2006). El cuntanscha uschia il temp d'uffizi limità da la lescha da 12 onns e sorta dal cussegl da banca.

La funcziun dal vicepresident da la banca surpiglia da nov il cusseglier da banca en uffizi Christian Thöny per il rest da sia perioda d'uffizi fin ils 31 da mars 2021. Christian Thöny è dapi 9 onns commember dal cussegl da banca e fa part da la cumissiun strategica. L'advocat ed econom che ha 65 onns posseda in'advocatura a Cuira.


Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas dal Grischun, tel. 081 257 32 01, e-mail Barbara.Janom@dfg.gr.ch


Gremi: regenza
Funtauna: rg chanzlia chantunala dal Grischun
Neuer Artikel