Zum Seiteninhalt

Dapli viafier e bus per il Grischun

  • Erste Mitteilung
  • Neuen Beitrag einfügen
Cun la midada da l'urari ils 10 da december 2017 daventa la purschida dal traffic public en il Grischun anc pli attractiva. Colliaziuns supplementaras serran largias en il tact e collian meglier las regiuns perifericas cun ils centers da traffic.

Novs basegns da mobilitad pretendan d'amplifitgar l'urari, cunzunt durant las uras marginalas. Il chantun Grischun ha elavurà soluziuns ensemen cun la confederaziun e cun las interpresas da transport. Cun il nov urari è la purschida da viafier daventada anc pli attractiva, ed er sin la rait da bus èn vegnidas cuntanschidas meglieraziuns essenzialas en las regiuns.

Colliaziun supplementara Turitg – Cuira
Da glindesdi fin venderdi cursescha a las 17:07 da nov in InterCity davent da la staziun principala da Turitg fin Cuira, cun colliaziun per San Murezzan, per Tavau e per la Surselva. Uschia exista tranter las 15:37 e las 18:37 il tact d'ina mes'ura nuninterrut da Turitg en il Grischun.

Dapli colliaziuns tar la Viafier retica
La Viafier retica po augmentar la purschida da ses urari sin differentas lingias. En direcziun d'Arosa e da la Surselva serra la midada da l'urari largias existentas en il tact. En direcziun da Mustér po uschia vegnir purschì da nov il tact dad in'ura nuninterrut tranter las 06:00 e las 23:00, cun ina purschida supplementara da mes'ura durant ils temps da grond traffic. En direcziun d'Arosa curseschan ils trens medemamain en il tact dad in'ura nuninterrut tranter las 05:00 e las 21:00. La saira durant la stagiun principala vegnan amplifitgadas las colliaziuns per Arosa tras in tren supplementar en tuttas duas direcziuns.
Tranter Landquart e l'Engiadina cursescha da glindesdi fin venderdi in tren supplementar en tuttas duas direcziuns. Las partenzas èn a las 18:20 davent da Landquart (sco colliaziun dal nov InterCity che parta a las 17:07 davent da Turitg) sco er la damaun a las 04:54 davent da Samedan cun colliaziun davent da San Murezzan.
Tras la prolungaziun dals dus ultims trens da Razén a Tusaun survegn la Tumleastga ina meglra colliaziun durant la saira. Da nov pon ins cuntanscher Tusaun davent da Cuira a las 21:56 ed a las 23:15 senza stuair midar tren.
La stad 2018 vegnan manads singuls trens cun cumposiziuns nostalgicas tranter Tavau e Filisur. Da quests trens pon ins far diever cun bigliets normals.

Dapli colliaziuns sin la rait da bus
La midada la pli impurtanta sin la rait da bus è l'introducziun dal tact d'ina mes'ura nuninterrut da glindesdi fin venderdi sin la lingia Cuira – Flem – Laax.
Sin la lingia d'auto da posta Tavau – Lai – Cuira cursescha ils lavurdis la damaun in curs supplementar en tuttas duas direcziuns (partenza da Tavau a las 05:05, partenza da Cuira a las 06:50). En Surselva vegnan prolungadas las uras da manaschi d'intginas lingias da bus la saira. En Engiadin'ota vegn l'express dal Lej dals Chöds integrà en la lingia 3 dal Bus d'Engiadina. Uschia vegnan purschidas durant l'enviern dapli colliaziuns davent da San Murezzan Vitg a la pendiculara dal Corvatsch. Il Puschlav survegn durant la stagiun da stad ina colliaziun svelta la damaun a las 06:05 davent da Le Prese, cun la quala ins cuntanscha Cuira gia a las 09:03. Grazia a la prolungaziun da la lingia da bus da Le Prese a Puntraschigna fin a Samedan vegn reducì il temp da viadi da Puschlav fin a Turitg per 42 minutas.

Simplificaziun da las tariffas da las purschidas da saira e da notg
Il supplement da notg vegn abolì en l'entir Grischun. Tranter las colliaziuns da di e da notg n'existan pli naginas differenzas da tariffa. Da nov pon ins far diever da tut las purschidas da saira e da notg cun tut ils bigliets valaivels (inclusiv BÜGA ed abunament general) senza stuair pajar in supplement.

Tut las midadas da l'urari pon vegnir consultadas online sin la pagina www.fahrplanfelder.ch.


Infurmaziuns:
Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch


Gremi: uffizi d'energia e da traffic
Funtauna: rg uffizi d'energia e da traffic
Neuer Artikel