Il departament d'educaziun, cultura e protecziun da l'ambient ha nominà Vendelin Cabernard sco nov manader da la cussegliaziun da professiun, da studi e da carriera. Cabernard è responsabel per la direcziun generala d'ina partiziun cun circa 25 collavuraturas e collavuraturs.

Il departament d'educaziun, cultura e protecziun da l'ambient ha elegì Vendelin Cabernard che ha 50 onns, sco nov manader da la cussegliaziun da professiun, da studi e da carriera. Cabernard lavura dapi l'avust 2011 sco cussegliader da professiun e da carriera tar l'uffizi per la furmaziun professiunala ed ha obtegnì durant quest temp il titel da cussegliader diplomà da professiun, da studi e da carriera. Avant ses temp tar l'uffizi era el emploià sco magister al gimnasi da la scola chantunala a Cuira.

Vendelin Cabernard daventa successur da Justina Simeon-Cathomas che va en pensiun la fin da schaner 2018, suenter in'activitad da 7 onns sco manadra ed avant da 23 onns sco cussegliadra da professiun, da studi e da carriera.

Sco successura da Vendelin Cabernard è vegnida elegida Annette Decurtins da Trun. Ella vegn ad entrar en plazza il 1. da favrer 2018 sco cussegliadra da professiun, da studi e da carriera en Surselva.

L'uffizi per la furmaziun professiunala è cumpetent per tut las dumondas da la furmaziun fundamentala professiunala e cumpiglia ils secturs cussegliaziun da professiun, da studi e da carriera, surveglianza dals emprendissadis, cussegliaziun da la scola professiunala, atelier d'emprendissadi per la creaziun da vestgadira e subvenziunescha differents furniturs da prestaziuns.

Fotografias agiuntadas:

Vendelin Cabernard

Annette Decurtins


Infurmaziuns:
Cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch


Gremi: departament d'educaziun, cultura e protecziun da l'ambient
Funtauna: rg uffizi per la furmaziun professiunala