Zum Seiteninhalt

Forza idraulica en il territori alpin – co funcziuna la producziun d'electricitad?

  • Erste Mitteilung
  • Neuen Beitrag einfügen
L'onn 2017/2018 presidiescha il Grischun la cuminanza da lavur da las regiuns alpinas (ARGE ALP). En il center stat il tema da la forza idraulica en il territori alpin. Ina seria da contribuziuns da video dat invistas interessantas da la producziun d'electricitad e mussa l'impurtanza da la forza idraulica per il territori alpin.

La forza idraulica è energia solara per propi: Il sulegl metta en moviment la circulaziun da l'aua, aua evapurescha, condensescha a nivels e returna sco plievgia sin la surfatscha da la terra. Grazia a las vals en il territori alpin sa rimna l'aua en ils flums. Tras questa accumulaziun resorta l'energia, che sa chatta en l'aua, en moda concentrada. Da la quantitad d'aua defluenta e da l'autezza da crudada resulta la prestaziun d'in implant electric da flum. Implants d'accumulaziun tiran a niz la differenza d'autezza tranter in lai d'accumulaziun situà en l'autezza ed ina deflussiun, per il solit in flum. La producziun d'electricitad en implants d'accumulaziun po vegnir adattada bain al basegn: Sch'i na vegn gist duvrada nagina electricitad, vegnan serrads ils ventils, uschia che nagina aua na sorta dal lai d'accumulaziun.

En ils implants idraulics vegnan utilisads differents tips da turbinas. Or da la roda d'aua che vegniva duvrada gia avant 3500 onns en Mesopotamia per tschiffar aua, han ils inschigners sviluppà en il decurs dal temp la turbina per metter en funcziun generaturs. Da tut las modas da producziun d'electricitad cuntanscha la tecnica perfecziunada da la forza idraulica l'efficacitad electrica la pli auta, numnadamain passa 90 pertschient. Quai vul dir che passa 90 pertschient da l'energia da l'aua po vegnir transfurmada en electricitad.

In nov video da la chanzlia chantunala mussa en moda simpla, co che la forza da l'aua vegn utilisada e co che la producziun d'electricitad funcziuna.

Tut las infurmaziuns davart l'onn presidial dal Grischun èn consultablas sut www.gr.ch/argealp, ed infurmaziuns generalas davart la ARGE ALP stattan a disposiziun sut www.argealp.org .


Infurmaziuns:
Beat Hunger, manader da la partiziun "producziun e provediment d'energia", uffizi d'energia e da traffic, tel. 081 257 36 26,  e-mail Beat.Hunger@aev.gr.ch


Gremi: ARGE ALP / chanzlia chantunala dal Grischun
Funtauna: rg ARGE ALP / chanzlia chantunala dal Grischun
Neuer Artikel

Co funcziuna la producziun d'electricitad?