Zum Seiteninhalt

Surdà ils premis "concurrenza scola e cultura 2017"

  • Erste Mitteilung
  • Neuen Beitrag einfügen
Il chantun Grischun ha publitgà quest onn per la segunda giada la "concurrenza scola e cultura". Tut en tut èn vegnids inoltrads nov projects fin la fin d'october.

"Scola e cultura" sa numna il nov instrument da la promoziun da la cultura dal Grischun che duai permetter – cun ina contribuziun finanziala dal chantun – als uffants ed als giuvenils en las scolas grischunas in access multifar ad ina vasta chapientscha da la cultura. La finamira è d'entusiasmar las scolaras ed ils scolars uschè baud ed uschè durablamain sco pussaivel per la cultura.

Promoziun da la cultura per scolaras e scolars grischuns

En il rom da quest instrument da promoziun ha la promoziun da la cultura dal Grischun lantschà per la segunda giada ina concurrenza ed ha envidà las scolas d'inoltrar projects d'art e da cultura ch'ellas han realisà durant ils onns da scola 2015/16 e 2016/17. Il dretg da participaziun han gì las scolas dal Grischun dals suandants stgalims: scolina, 1. fin 9. classa, gimnasis inferiurs, scolas privatas (per las partiziuns dal temp da scola obligatoric). Las lavurs pudevan cumpigliar pliras classas u plirs stgalims e stuevan avair in connex cun la scola.

La giuria ha premià trais projects
La concurrenza è vegnida annunziada l'avust 2017 en il Fegl scolastic grischun e supplementarmain en la pressa quotidiana grischuna. Il termin d'annunzia è scadì la fin d'october 2017. Las commembras ed ils commembers da la cumissiun, Margrit Darms-Landolt, commembra da la cumissiun chantunala per promover la cultura, Luca Maurizio, magister ed artist, ed Armon Fontana, promoziun da la cultura dal Grischun, han examinà ils projects inoltrads da la fin d'october fin mez november.

Sin recumandaziun da la giuria da la concurrenza e sin proposta da l'uffizi da cultura ha il departament d'educaziun, cultura e protecziun da l'ambient distinguì ils suandants trais projects cun in premi: La surdada dal 1. premi ha lieu mesemna, ils 24 da schaner 2018 a las 16.00, a Puschlav en preschientscha dal cusseglier guvernativ Martin Jäger.


1. premi (3000 francs)
Scola elementara Puschlav, sedia Puschlav (6. classa primara), scola elementara Puschlav, sedia San Carlo (1. classa primara), scola elementara Vicosoprano (4. e 5. classa primara), scola Malögia (1. fin 6. classa primara)
Persunas d'instrucziun: Sandra Zala, Luciana Nussio, Romeo Gianotti, Bianca Geronimi
Direcziun dal project: Franca Caspani, scola auta da pedagogia dal Grischun
Project: "Sprachen im KOchtoPF" (teater)

2. premi (2000 francs)
Scola Lumnezia, Vella, 3. classa dal stgalim superiur
Persunas d'instrucziun: Armin Caduff; Jonas Egloff (pedagog da teater)
Project: "Ängste im Alltag" (teater)

3. premi (1000 francs)
Scola communala Vaz, scola Lai (scolina, classas primaras, classas dal stgalim superiur)
Persunas d'instrucziun: persunas d'instrucziun da la scola Lai (incl. persunas d'instrucziun PCS e persunas d'instrucziun spezialisadas)
Direcziun dal project: Silvia Iten, Ilaria Nyfeler, Sandro Schär
Project: "Menschlich – Mensch sein – As menschalat" (project che cumpiglia pliras spartas)


Infurmaziuns:
- Barbara Gabrielli, manadra da l'uffizi da cultura, Loëstrasse 26, 7001 Cuira, tel. 081 257 48 01, e-mail Barbara.Gabrielli@afk.gr.ch
- Armon Fontana, promoziun da la cultura dal Grischun, Loëstrasse 26, 7001 Cuira, tel. 081 257 48 02, e-mail Armon.Fontana@afk.gr.ch


Gremi: uffizi da cultura
Funtauna: rg uffizi da cultura
Neuer Artikel