La regenza ha deliberà contribuziuns per la Nova Fundaziun Origen e per l'arena da biatlon Planeiras. Ultra da quai ha ella approvà ina nova ovra idraulica a Luzein.
Contribuziun chantunala pe il project "Origen 2020 incl. teater dal Güglia"
Per il project "Origen 2020 incl. teater dal Güglia" conceda la regenza a la Nova Fundaziun Origen, Riom, ina contribuziun chantunala da maximalmain 800 000 francs als custs d'investiziun planisads da ca. 12 milliuns francs. Quest import vegn concedì cun la resalva che la finanziaziun totala saja reglada e che tut las permissiuns necessarias per la construcziun dals singuls projects parzials sajan avant maun. Il project vegn sustegnì sut il titel "infrastructuras relevantas per il sistem". Ils proxims 10 onns duai Origen Festival Cultural daventar ina da las instituziuns da teater las pli interessantas ed impurtantas dal territori alpin e gidar uschia essenzialmain a sviluppar la regiun Alvra. Ina relevanza artistica, programs unics, la colliaziun regiunala e cooperaziuns internaziunalas caracteriseschan l'interpresa culturala. Per cuntanscher questa finamira sto l'infrastructura vegnir extendida sistematicamain ed intensivamain. En il rom dad "Origen 2020" èn planisads plirs projects da construcziun che duain sustegnair la creaziun d'ina destinaziun da cultura alpina.
©Nova Fundaziun Origen
Contribuziun supplementara a l'arena da biatlon Planeiras
La regenza conceda a la vischnanca da Lantsch ina contribuziun chantunala supplementara da maximalmain 1,2 milliuns francs a la construcziun da l'arena da biatlon Planeiras. En il rom da la nova politica regiunala (NPR) aveva la regenza concedì gia ils 21 d'avust 2012 a la vischnanca da Lantsch in credit federal restituibel dad 850 000 francs als custs da circa 6,44 milliuns francs, cun ils quals è vegnì fatg quint quella giada, sco er contribuziuns chantunalas da ca. 1,14 milliuns francs en il senn dal concept per implants da sport d'impurtanza naziunala (CISIN).
Pervia da la dumonda creschenta è l'arena da biatlon Planeiras vegnida engrondida en il fratemp e cumplettada cun il Nordic House. Ils custs d'investiziun importan da nov totalmain circa 20 milliuns francs. Tenor las prestaziuns da promoziun fixadas ed en il senn dal concept per implants da sport d'impurtanza naziunala e chantunala (CISIN/CISIC) èsi perquai adequat da conceder ina contribuziun chantunala supplementara da maximalmain 1,2 milliuns francs sut il titel "infrastructuras relevantas per il sistem".
©Biathlon Arena Lenzerheide SA
Glisch verda per ina nova ovra idraulica a Luzein
La regenza ha approvà la dumonda da concessiun e da project da l'Ovra electrica Schanielabach SA (en fundaziun) per l'ovra electrica en l'aual da Schaniela. Ultra da quai ha ella approvà la concessiun dal dretg da las auas emessa da las vischnancas da Luzein e da St. Antönien (oz vischnanca da Luzein) per utilisar l'aual da Schaniela e concedì las permissiuns necessarias per construir e per manar l'ovra electrica.
L'Ovra idraulica Schanielabach SA ha l'intenziun da trair a niz la forza idraulica da l'aual da Schaniela sin il territori communal da Luzein per producir electricitad. I vegn quintà cun ina producziun annuala media da 7,4 uras da gigawatt.
Sanaziun da la via da l'Alvra tranter Gravules-ch e La Punt
Il project per la correcziun da la via da l'Alvra, traject Gravules-ch – La Punt, vegn approvà da la regenza.
La via da l'Alvra, ina via chantunala da colliaziun, collia ils vitgs da la part nord da la Val d'Alvra (Filisur, Bravuogn u Preda) cun l'Engiadin'ota e cun las vals dal sid cunfinantas. La via dal pass è vegnida engrondida e renovada successivamain ils ultims decennis. Tranter Gravules-ch e l'entrada ost dal vitg da La Punt èn fin ussa mo vegnidas fatgas lavurs da mantegniment. Correspundentamain è la via en in stadi fitg nausch. La capacitad sco er la protecziun cunter la schelira da la surstructura èn insuffizientas ed i manca in allontanament d'aua per ils vials. Perquai che la via è fitg stretga, na pon plinavant dus vehichels strusch sa cruschar.
Tras la correcziun da la via planisada duai quest traject vegnir renovà totalmain e vegnir schlargià da nov a 4,20 m. Las curunas ruttas dals mirs da la vart da la val vegnan remplazzadas. La punt che traversa l'Ova d'Alvra sto vegnir remplazzada per motivs da la protecziun cunter aua gronda. Ils custs totals da construcziun importan circa 4,3 milliuns francs.
Sustegn finanzial per in project da correcziun da las auas a Mesauc
La regenza ha approvà cun intginas cundiziuns il project da rempars per il Riale Bess en la vischnanca da Mesauc. Al sustegn finanzial sa participeschan la confederaziun ed il chantun tenor la cunvegna da program "rempars d'auas". Dals custs totals da var 1,2 milliuns francs surpiglian la confederaziun maximalmain 420 000 francs ed il chantun maximalmain 240 000 francs. Plinavant ha la regenza concedì ina contribuziun chantunala da maximalmain 108 000 francs tenor la lescha davart las vias.
Il Riale Bess è in torrent che po chaschunar bovas. El nascha sut la Cima de Gagela e curra amez tras il center dal vitg da Mesauc. Ils 3 da fanadur 2015 è l'aual sa stagnà suenter fermas precipitaziuns e suenter ina bova. Suenter che quest rempar natiral è rut, ha la massa d'aua chaschunà gronds donns en il vitg. La vischnanca da Mesauc ha perquai elavurà in nov project da rempars. Il project ha la finamira da reducir il privel d'aua gronda. A medem temp vegnan sanadas las parts dal rempar ch'eran vegnidas donnegiadas.
Gremi: regenza
Funtauna: rg chanzlia chantunala dal Grischun