Navigation

Inhaltsbereich

Communicaziun da la regenza dals 18 da schaner 2018

  • Erste Mitteilung
  • Neuen Beitrag einfügen
La regenza ha surdà il premi grischun da cultura da quest onn. Vinavant ha ella acceptà l'invit per la "Soirée Suisse" en Belgia.

Il premi grischun da cultura 2018 vegn surdà a Corin Curschellas
La regenza surdat il premi grischun da cultura 2018 a Corin Curschellas. La musicista da Rueun è chantadura, cumponista, perscrutadra, leadra d'ina band, actura e promotura. Corin Curschellas è ina gronda vusch dal Grischun e da la musica mundiala. Il premi è dotà cun 30 000 francs.
Corin Curschellas chanta, ella suna clavazin, dulcimer, citra, armonium indic, percussiun, accordeon e synthesizer. Ella cumpona per Michael von der Heide, Vera Kaa, Dodo Hug e Stina Werenfels. Ultra da quai è Corin Curschellas ina vaira archeologa da musica: ella s'occupa cun la chanzun populara rumantscha. Ella arranscha ed interpretescha da nov veglias chanzuns rumantschas. Ella è en gronda furma, cur ch'ella sveglia e dat vita en moda dramatica, trista, garmadia e plain temperament a las chanzuns ch'èn idas en emblidanza.
Sper sias atgnas prestaziuns artisticas è Corin Curschellas er promotura da cultura ed intermediadra d'art sco scolasta da musica a Glion. U ella envida cun "corin invit" a concerts, prelecziuns e teater en il Cinema sil Plaz, savens ensemen cun reschissuras, acturs, scenarists. A Turitg tutga ella tar las organisaturas da "Volksmusig im Volkshus".
L'operar da Corin Curschellas enritgescha la vita culturala en Surselva, en il chantun Grischun, en Svizra ed en il mund. Il chantun Grischun ha promovì in pèr da ses projects, la regenza l'ha undrada l'onn 2010 cun in premi da renconuschientscha. L'artista ha cumplenì l'onn passà 61 onns. Ella ha deditgà sia vita e sia forza a l'art. Cun in stgazi prezius e multifar sco resultat. Quai merita il premi grischun da cultura 2018.

-
©Slava Hlavacek

Plinavant ha la regenza concedì otg premis da renconuschientscha e set premis da promoziun da mintgamai 20 000 francs. Ils premis vegnan surdads ils 15 da zercladur 2018 en il rom d'ina festa en la baselgia da la claustra da Glion.

glista da tut las persunas premiadas 2018

Il Grischun sco chantun ospitant a la "Soirée Suisse" a Brüssel
Sin invitaziun dal schef da missiun da la Svizra tar l'Uniun europeica, ambassadur Urs Bucher, prenda il Grischun part sco chantun ospitant a la "Soirée Suisse" a Brüssel. La regenza collia questa visita cun in program politic accumpagnant cun scuntradas da represchentants da las instituziuns europeicas. A questa occurrenza ha il chantun Grischun l'occasiun da preschentar a Brüssel la diversitad culturala, culinarica e linguistica sco er las bellezzas da la cuntrada e l'ospitalitad dal Grischun en moda autentica e cordiala.
La "Soirée Suisse" è in'occurrenza svizra che ha lieu mintg'onn e che vegn organisada dapi l'onn 2012 da la missiun svizra tar la UE ensemen cun l'ambassada svizra en Belgia e cun la missiun svizra tar la NATO. L'intent da questa saira è oravant tut la tgira da contacts cun las instituziuns europeicas e belgias, cun ils purtaders d'opiniun politics ed academics sco er cun las medias.


Gremi: regenza
Funtauna: rg chanzlia chantunala dal Grischun
Neuer Artikel