L'uffizi per la furmaziun professiunala ha creà la pagina d'internet rumantscha www.cussegliaziun.ch per gidar ils giuvenils a tschertgar ina plazza d'emprendissadi, ina scola media u ina soluziun transitorica. Sin questa pagina d'internet chattan ins infurmaziuns davart tut ils emprendissadis pussaivels.

Il portal d'internet descriva las incumbensas las pli impurtantas, las premissas necessarias, la durada ed il cuntegn da la scolaziun. Ultra da quai vegnan inditgadas er las furmaziuns supplementaras pussaivlas suenter l'examen d'emprendissadi.

Agid gia en connex cun il fufragnadi
La pagina d'internet porscha gia agid per tschertgar in fufragnadi adattà. Cussegls impurtants gidan ils giuvenils ad agir tenor ina metoda. Sch'i na duess betg funcziunar cun in fufragnadi, mussa la pagina d'internet differentas vias che pon vegnir prendidas sco alternativa.

Simpla survista
Infurmaziuns supplementaras davart temas impurtants chattan ins cun in clic sin ils fegls d'infurmaziun utils. Tractads vegnan temas sco annunzia per in fufragnadi u per ina plazza d'emprendissadi, scolas medias, maturitad professiunala u 10. onn da scola.

Cun agid da la pagina d'internet www.cussegliaziun.ch chattan giuvenils, persunas d'instrucziun e geniturs fitg bunas infurmaziuns davart il mund professiunal – e tut quai per rumantsch. L'uffizi per la furmaziun professiunala giavischa in viadi digital captivant ed ina buna tscherna da professiun.

Agiunta:
fegl sgulant


Infurmaziuns:
Justina Simeon-Cathomas, manadra da la partiziun cussegliaziun da professiun, da studi e da carriera, tel. 081 257 62 02, e-mail Justina.Simeon@afb.gr.ch


Gremi: uffizi per la furmaziun professiunala
Funtauna: rg uffizi per la furmaziun professiunala