Navigation

Inhaltsbereich

Communicaziun da la regenza dal 1. da favrer 2018

  • Erste Mitteilung
  • Neuen Beitrag einfügen
La regenza ha dà glisch verda per in nova installaziun da velo da muntogna ad Arosa ed ha approvà la construcziun d'ina nova gallaria da protecziun sin la via d'Engiadina. Plinavant ha ella concedì ina contribuziun d'investiziun per in studi a la SATE a Cuira.

Glisch verda per ina nova installaziun da velo da muntogna ad Arosa
La regenza ha approvà la revisiun parziala da la planisaziun locala d'Arosa, concludida da la vischnanca ils 21 da matg 2017. Cun questa approvaziun vegnan stgaffidas las premissas da la planisaziun dal territori per installar in nov indriz da velo da muntogna (in uschenumnà flowtrail) dal Hörnli fin giu ad Innerarosa. Per l'autra èn vegnids determinads en differents lieus novs trajects parzials per velos da muntogna u per sendas da viandar, per separar questas duas gruppas d'utilisaders.

-
©Uffizi federal da topografia

Nova gallaria per proteger la via d'Engiadina
La regenza ha approvà in project per construir ina nova gallaria per proteger la via d'Engiadina sin il traject da Martina fin Ovella. Las crudadas da crappa dals ultims 20 onns en il sectur da Mingèr pretendan mesiras per proteger la via sin ina lunghezza da ca. 60 meters pervia dal potenzial da privel eruì. Ultra da quai exista sin quest traject er in privel da lavinas, e quai sin ina lunghezza da ca. 170 meters. Pervia dal privel da lavinas ch'exista a medem temp, po mo ina gallaria proteger la via suffizientamain cunter crudada da crappa.
Sco mesira duai vegnir construida ina gallaria d'ina lunghezza da 60 meters. En quai che concerna il privel da lavinas duai vegnir empruvà da reducir supplementarmain la ristga per la via cun agid d'in indriz d'alarm. Ils custs totals da quest project importan circa 4,2 milliuns francs.

-

Il chantun investescha en il know-how fotonic regiunal
La regenza ha concedì a la scola auta da tecnica ed economia Cuira (SATE Cuira) in import d'investiziun da mintgamai maximalmain 500 000 francs per onn per installar e per engrondir ils laboratoris per il studi "fotonics" durant ils onns 2017 e 2018.
Fotonics cumpiglia en il senn pli vast tut ils products e tut las proceduras che sa basan sin la collavuraziun da cirquits electronics e da glisch. La finamira dal studi da bachelor per fotonics ch'è unic en Svizra è quella da garantir ina scolaziun cun in bun access a la pratica. Suenter la finiziun dal studi duain las inschigneras ed ils inschigners disponer tant d'experientscha pratica sco er d'ina savida teoretica che als qualifitgescha sco forzas da lavur futuras per l'industria da fotonica. Per cuntanscher quai dovri differentas installaziuns da laboratori, cun las qualas las studentas ed ils students pon rimnar experientschas praticas. Parallelamain als laboratoris da student vegn installà in nov laboratori da perscrutaziun. Là vegnan elavurads ils numerus projects d'industria dad interpresas regiunalas e naziunalas ch'èn gia avant maun.
Questas prestaziuns da servetsch, da cussegliaziun e da perscrutaziun pussibiliteschan a l'industria da fotonica locala da sviluppar products cun ina prestaziun pli gronda e cun in meglier grad da maturitad, da spargnar custs e d'accelerar ils temps d'introducziun en il martgà. La disponibladad da quest know-how en il sectur da la fotonica po ultra da quai vegnir valità sco avantatg per il chantun, sch'interpresas novas ed innovativas tschertgan in lieu da producziun. L'installaziun pussibilitescha da sviluppar vinavant e d'intensivar il sectur da la fotonica en la regiun e contribuescha directamain a la creschientscha da l'economia.


Gremi: regenza
Funtauna: rg chanzlia chantunala dal Grischun
Neuer Artikel