Navigation

Inhaltsbereich

La regenza dal Tessin sin visita en il Grischun

  • Erste Mitteilung
  • Neuen Beitrag einfügen
Sin invit da la regenza grischuna ha la regenza dal Tessin visità oz il chantun Grischun. En il rom dal discurs da lavur constructiv a Lostallo èn vegnids tractads differents temas interchantunals.

Sin sia visita en il chantun Grischun è la regenza dal Tessin vegnida manada dal president da la regenza Manuele Bertoli. El è vegnì accumpagnà dals cussegliers guvernativs Claudio Zali, Paolo Beltraminelli, Christian Vitta e Norman Gobbi sco er dal chancelier Arnoldo Coduri.

Las regenzas dals chantuns Tessin e Grischun èn sa scuntradas ad in discurs da lavur a Lostallo en la Mesolcina. Tematisads èn vegnids tranter auter il program d'aglomeraziun da la 4. generaziun per l'aglomeraziun da Bellinzona, la situaziun concernent las firmas fictivas en la Mesolcina, la mobilitad en la zona d'industria da San Vittore sco er mesiras per promover la lingua e cultura taliana. Plinavant han la sanaziun dal tunnel dal Gottard sco er il program da la nova politica regiunala "San Gottardo 2020" procurà per in barat interessant.

Ultra dal discurs da lavur han ins visità ina interpresa locala en la Mesolcina. Las regenzas èn vegnidas accumpagnadas oz avantmezdi tar la Swiss Alpine Fish SA a Lostallo, l'emprima tratga da salmuns indoor en Svizra, dal president communal Nicola Giudicetti, dal vicepresident communal Andrea Peduzzi e da Samuele Censi, president da la regiun Moesa. Suenter il discurs da lavur è in gentar cuminaivel da las duas delegaziuns stà sin il program.

Fotografias agiuntadas:
-
Il president da la regenza Manuele Bertoli (a dretga) ed il president da la regenza Mario Cavigelli.

-
La delegaziun grischuna e tessinaisa a lur scuntrada a Lostallo.


Gremi: regenza
Funtauna: rg chanzlia chantunala dal Grischun
Neuer Artikel