Navigation

Inhaltsbereich

Nov maximum da cussegliaziuns tar l'agid a victimas dal Grischun

  • Erste Mitteilung
  • Neuen Beitrag einfügen
L'agid a victimas dal Grischun ha cusseglià l'onn 2017 passa 600 victimas da violenza e persunas pertutgadas da mesiras repressivas per motivs da provediment. Uschia ha il dumber da cas cuntanschì in nov maximum.

Cun 618 cas currents ha il post da cussegliaziun da l'agid a victimas dal Grischun assistì l'onn 2017 tantas persunas sco anc mai. Vitiers èn vegnidas var tschient cussegliaziuns curtas al telefon per persunas pertutgadas e per persunas spezialisadas.

Cussegliaziuns per l'agid a victimas
Da las 522 persunas pertutgadas da violenza ch'èn vegnidas cussegliadas han 59 pertschient subì in act da violenza u ina blessura corporala, in tschintgavel dad ellas (12 %) è vegnì blessà en il traffic sin via. Mintga terza victima (33 %) è stada exponida a violenza sexuala. 32 pertschient èn stads pertutgads d'extorsiun, da smanatscha u da constricziun. Ulteriurs malfatgs subids èn stads tranter auter rapina e mazzaments per negligientscha u emprovas da mazzament.

Passa 40 pertschient da tut ils acts da violenza èn vegnids commess a chasa, e quai dal partenari (63 %) resp. da la partenaria (4 %) u d'in auter commember resp. d'ina autra commembra da la famiglia (33 %). En 22 cas da violenza a chasa ha stuì vegnir intermedià temporarmain in alloschi da protecziun u d'urgenza.

Persunas pertutgadas da violenza èn sa drizzadas a l'agid a victimas cun dumondas davart la denunzia penala e davart la procedura penala sco er per survegnir in sustegn psicologic per dumagnar las consequenzas dals malfatgs. Er d'accumpagnaments ad interrogaziuns e da sustegn en dumondas d'assicuranza èsi vegnì fatg diever. L'agid a victimas ha intermedià assistenza giuridica a 228 persunas sco er assistenza psicologica a 224 persunas ed ha surpiglià ils custs betg cuvrids.

Mesiras repressivas per motivs da provediment
Var 100 persunas pertutgadas da mesiras repressivas per motivs da provediment èn sa drizzadas fin la fin da l'onn 2017 a l'agid a victimas dal Grischun sco post chantunal da consultaziun per talas mesiras repressivas. Las persunas pertutgadas èn vegnidas sustegnidas tar la tschertga d'actas, e quai en collavuraziun cun l'archiv dal stadi dal Grischun. Ed ellas han survegnì agid per inoltrar a la confederaziun la dumonda per ina contribuziun da solidaritad. Talas dumondas pon anc vegnir inoltradas fin ils 31 da mars 2018.

Agid a victimas dal Grischun
L'agid a victimas dal Grischun cusseglia e sustegna dunnas, umens, uffants e giuvenils ch'èn pertutgads da violenza. Las cussegliaziuns èn gratuitas, voluntaras, confidenzialas e sin giavisch anonimas. Ultra da cussegliaziuns en cas da delicts da violenza, da delicts sexuals e da violenza a chasa porscha l'agid a victimas er sustegn en cas da smanatscha e da constricziun, da stalking e d'accidents cun culpa da terzas persunas (accidents da traffic, da lavur, da muntogna). Pussaivladad da contact per persunas pertutgadas, per persunas parentas e per persunas spezialisadas: tel. 081 257 31 50 / e-mail Opferhilfe@soa.gr.ch


Infurmaziuns:
- Susanna Gadient, manadra da l'uffizi dal servetsch social, tel. 081 257 26 51, e-mail Susanna.Gadient@soa.gr.ch
- Gian Beeli, manader dal post da cussegliaziun per l'agid a victimas, tel. 081 257 31 53, e-mail Gian.Beeli@soa.gr.ch


Gremi: uffizi dal servetsch social
Funtauna: rg uffizi dal servetsch social
Neuer Artikel