Navigation

Inhaltsbereich

Cumbat cunter la schelira en las vignas

  • Erste Mitteilung
  • Neuen Beitrag einfügen
Ils proxims dis fan il Plantahof e l'uffizi per la natira e l'ambient tests areguard il cumbat cunter la schelira en ina vigna a Fläsch. En quest connex vegnan els sustegnids efficaziamain da las viticulturas e dals viticulturs. Sch'il termometer croda sut nulla grads, vegnan a traglischar blers pitschens fieus durant tschintg notgs.

En la segunda mesadad da l'avrigl 2016 e 2017 hai dà scheliras tardivas en la Val dal Rain grischuna che han chaschunà donns vi da las vits. Per tegnair il donn uschè pitschen sco pussaivel han las viticulturas ed ils viticulturs prendì differentas mesiras cunter la schelira. Mesiraziuns da las temperaturas e da l'effect da las singulas metodas han però mancà. Perquai fan ussa il Plantahof e l'uffizi per la natira e l'ambient en la segunda mesadad dal mars u il cumenzament da l'avrigl tests cun fieus en ina vigna a Fläsch. Las datas precisas n'èn anc betg fixadas, perquai ch'ellas dependan da las cundiziuns da l'aura. Ils tests vegnan fatgs da preferenza en notgs cun temperaturas sut nulla grads e cun tschiel serain. A 30 differents lieus vegnan mesiradas las temperaturas e la concentraziun da pulvra fina.

Durant tschintg notgs vegnan duvrads chandailas cunter schelira, brichets ed il FrostGuard (in apparat che sufla aria chauda tras las vignas). Concretamain vegnan fatgs tests cun mintgamai 300 u 600 chandailas cunter schelira respectivamain cun mintgamai 10 mantuns da brichets per hectara. Il test vegn fatg sin ina surfatscha da 25 aras da la parcella nr. 711 en il Fläscher Feld che vegn cultivada da Thomas Marugg.

Quests tests han dus intents. Primo furneschan els valurs concretas davart las temperaturas en dependenza da las mesiras. Secundo sa tracti da pudair dar recumandaziuns concretas a las viticulturas ed als viticulturs en cas d'eveniments da schelira futurs.


Infurmaziuns:
Hans Jüstrich, post spezialisà per viticultura al Plantahof, tel. 081 257 60 60, mob. 079 407 34 71, e-mail Hans.Juestrich@plantahof.gr.ch


Gremi: Plantahof
Funtauna: rg Plantahof
Neuer Artikel