Navigation

Inhaltsbereich

  • Erste Mitteilung
  • Neuen Beitrag einfügen
L'institut per evaluaziun da la furmaziun da l'universitad da Turitg ha eruì il zercladur 2017 en tut las 2. classas dal stgalim secundar I en il chantun Grischun il stadi d'emprender da las scolaras e dals scolars en il rom englais. Il rapport final da questa eruida dal stadi d'emprender è ussa avant maun cun resultats detagliads. Sin fundament dals resultats po l'instrucziun d'englais en il chantun Grischun vegnir giuditgada sco success. La maioritad da las scolaras e dals scolars ademplescha las prescripziuns dal plan d'instrucziun.

La realisaziun dal project "Introducziun da l'englais sco segunda lingua estra" en la scola populara dal chantun Grischun è vegnida terminada l'onn da scola 2016/17. Gia en la missiva da la regenza al cussegl grond tar la "revisiun parziala da la lescha davart las scolas popularas dal chantun Grischun (lescha da scola) e da l'ordinaziun executiva tar la lescha da scola" dals 27 da november 2007 era vegnida surdada l'incumbensa da far in'evaluaziun. Il matg 2016 ha il departament d'educaziun, cultura e protecziun da l'ambient incumbensà l'inspecturat chantunal da scola cun la direcziun per la coordinaziun, per la logistica e per la communicaziun da questa evaluaziun. L'evaluaziun da las cumpetenzas en englais en il chantun Grischun è vegnida realisada da l'institut per evaluaziun da la furmaziun da l'universitad da Turitg, e quai per gronda part sur computer.

Test cumplessiv da las enconuschientschas da l'englais

Sut la direcziun da prof. dr. Urs Moser ha l'institut examinà las cumpetenzas da tut las scolaras e da tut ils scolars da las 2. classas dal stgalim secundar I en tadlar e chapir, en leger e chapir, en discurrer, en scriver sco er en grammatica. Las lezias ed ils pensums dals tests èn vegnids sviluppads cuminaivlamain da persunas d'instrucziun dal chantun Grischun sco er d'expertas ed experts per tests da linguas estras. Ils differents tests èn vegnids fatgs da 1497 scolaras e scolars dal chantun Grischun. Per giuditgar las cumpetenzas en englais en cumparegliaziun cun las pretensiuns dal plan d'instrucziun han ins engaschà persunas d'instrucziun dal chantun Grischun sco er expertas ed experts internaziunals.

Bunas notas per il Grischun
L'eruida dal stadi d'emprender ha mussà che la maioritad da las scolaras e dals scolars ademplescha las prescripziuns dal plan d'instrucziun. Ils resultats èn congruents cun studis cumparegliabels en auters chantuns da la Svizra. Quai è allegraivel, sch'ins tira en consideraziun ch'intgins chantuns impundan dapli lecziuns per l'instrucziun d'englais. Areguard las regiuns linguisticas sa mussi che las scolaras ed ils scolars da lingua tudestga e rumantscha cuntanschan cumpetenzas cumparegliablas e che las cumpetenzas da las regiuns talianas èn in pau pli bassas en tadlar e chapir. Plinavant mussa il rapport che scolaras e scolars da lingua estra cuntanschan en tut ils champs da cumpetenza megliers resultats che scolaras e scolars che han lur emprima lingua sco lingua da scola. Sco uffants da lingua estra valan uffants da famiglias immigradas u uffants che discurran sco emprima lingua ina lingua chantunala, ma betg la lingua da scola. Plinavant èsi interessant che l'organisaziun da l'instrucziun (instrucziun da classas singulas visavi instrucziun da pliras classas) e la grondezza da la classa n'han nagin connex cun las cumpetenzas en englais. Surprendenta è la constataziun che singulas scolaras e singuls scolars cun in basegn spezial da promoziun adempleschan u surpassan schizunt las pretensiuns dal plan d'instrucziun en connex cun las enconuschientschas da l'englais.

Sco gia enconuschent tras autras retschertgas stattan la derivanza sociala e la schlattaina en in connex cun las cumpetenzas en englais. Pli privilegiada che la derivanza sociala è, e meglras che las cumpetenzas en englais èn. Ils mats cuntanschan en scriver ed en grammatica tendenzialmain mendras cumpetenzas en englais che las mattas.

Il rapport cumplet stat a disposiziun sin la pagina d'internet da l'uffizi per la scola populara ed il sport.


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch
- prof. dr. Urs Moser, institut per evaluaziun da la furmaziun da l'universitad da Turitg, tel. 043 268 39 61, e-mail Urs.Moser@ibe.uzh.ch


Gremi: departament d'educaziun, cultura e protecziun da l'ambient
Funtauna: departament d'educaziun, cultura e protecziun da l'ambient
Neuer Artikel