Navigation

Inhaltsbereich

Nov model directiv da militar dal chantun Grischun

  • Erste Mitteilung
  • Neuen Beitrag einfügen
En il model directiv da militar dal chantun Grischun preschenta il departament da giustia, segirezza e sanadad ils champs d'acziun e las maximas da la politica grischuna da militar. Il model directiv vul rinforzar la collavuraziun da las autoritads chantunalas e communalas cun l'armada svizra e mussar a la populaziun la plivalur d'ina stretga relaziun tar l'armada, ch'è caracterisada da confidenza.

Il model directiv mussa, quant impurtanta che l'armada svizra è per il chantun Grischun. Nagin auter chantun na dovra uschè savens il sustegn da l'armada sco il Grischun. Bunamain mintga onn è noss chantun muntagnard tutgà da gronds eveniments da la natira. Ils onns 2016 e 2017 per exempel ha l'armada mess a disposiziun immediatamain e nuncumplitgadamain las appartegnentas ed ils appartegnents da l'armada sco er ils meds necessaris per gidar a superar las consequenzas da la bova al Piz Cengalo en la Bregaglia u ils incendis da guaud en la Val Calanca. Var 5000 appartegnentas ed appartegnents da l'armada prestan onn per onn lur servetsch en il rom da la segirada dal Forum economic mundial (WEF) a Tavau. Vitiers vegnan nundumbraivels dis da servetsch per sustegnair grondas occurrenzas da sport sco ils campiunadis mundials da skis alpin da la FIS a San Murezzan, tut las cursas da skis da la cuppa mundiala ed il maraton da skis engiadinais.

Rinforzar la rait da segirezza e mantegnair la preschientscha da l'armada

La tgira d'in partenadi stretg e permanent cun l'armada è da gronda impurtanza per la segirezza e per il bainstar dal chantun Grischun. Per l'avegnir vali perquai da promover e da sviluppar vinavant la collavuraziun cun l'armada per superar cuminaivlamain eveniments extraordinaris e per garantir la segirezza en cas d'occurrenzas grondas. Er al mantegniment da las plazzas da tir e d'instrucziun sto vegnir attribuida in'auta prioritad per segirar la creaziun da valurs e las plazzas da lavur en il chantun.

Confess al princip da milissa

Il princip da milissa, ch'è francà fermamain en la populaziun, furma er en l'avegnir la basa dal sistem da l'obligaziun da servetsch en Svizra. Il princip da milissa sa basa sin la conscienza che las burgaisas ed ils burgais surpiglian persunalmain lur responsabladad envers la cuminanza e s'engaschian persunalmain per la protecziun e per la segirezza dal pajais. Perquai che noss chantun dovra regularmain il sustegn da l'armada, vul il Grischun prestar sia contribuziun a favur da l'alimentaziun persunala da l'armada.

Il model directiv da militar dal chantun Grischun sa drizza a tut las commembras e tut ils commembers d'autoritads che han da sa fatschentar cun dumondas da segirezza, ma er a burgaisas e burgais interessads. Cun il model directiv vuless il departament da giustia, segirezza e sanadad mussar a la publicitad interessada sias finamiras e ses champs d'acziun da la politica militara sco er la plivalur d'ina stretga relaziun tar l'armada svizra, ch'è caracterisada da confidenza.

Agiunta:
model directiv da militar

Infurmaziuns:
- cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  
- lic. phil. Martin Bühler, manader da l'uffizi da militar e da protecziun civila, tel. 081 257 35 22, e-mail Martin.Buehler@amz.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel