L'onn da scola 2018/19 entra en vigur il Plan d'instrucziun 21 Grischun. La chasa editura per meds d'instrucziun dal Grischun adatta ses sortiment al nov plan d'instrucziun e preschenta intginas novaziuns.

Il sortiment da la chasa editura per meds d'instrucziun dal Grischun vegn adattà ed engrondì cun novs secturs spezials en vista al Plan d'instrucziun 21 Grischun (PI21 GR). Il sortiment vegn engrondì cunzunt per la scolina. Per quest stgalim vegnan recepids numerus artitgels novs. Ultra da quai na vegnan quels betg pli purschids en ina categoria separada, mabain integrads en ils singuls champs. Per tut ils champs e per tut ils stgalims da scola vegnan publitgads adina puspè novs meds d'instrucziun che vegnan recepids uschè svelt sco pussaivel en il sortiment. La categorisaziun actualisada dals artitgels tenor ils champs a maun dal PI21 GR sa chatta en il catalog 2018 stampà, en l'exposiziun dals meds d'instrucziun ed en il nov webshop.

Exposiziun dals meds d'instrucziun da nov en la chasa da medias
Dapi il cumenzament da l'onn 2018 sa chatta l'exposiziun dals meds d'instrucziun dal Grischun da nov al plaunterren da la chasa da medias a la Sommeraustrasse 32. Persunas d'instrucziun ed ulteriuras persunas interessadas pon consultar là, da glindesdi fin venderdi da las 9.00 fin las 16.30, l'entir sortiment dals meds d'instrucziun, far empustaziuns al lieu e sa laschar trametter ils meds d'instrucziun a chasa u en scola. La retratga directa da meds d'instrucziun è mo pli pussaivla en cas excepziunals, perquai che l'exposiziun ed il deposit n'èn betg pli en il medem lieu.

Nov webshop e nova adressa d'empustaziun
Dapi il cumenzament d'avrigl è il nov webshop online sin www.lmv.gr.ch. Il sortiment sa preschenta là en ina cumparsa moderna, medemamain orientada al PI21 GR ed envida da sfegliar en ils novs artitgels. Ultra da quai surpiglia la Somedia Production SA l'entira administraziun da las empustaziuns da meds d'instrucziun. Las empustaziuns ston perquai vegnir drizzadas a partir d'immediat a la suandanta adressa:

Somedia Production SA
Auslieferung Lehrmittel Graubünden
Sommeraustrasse 32, 7000 Cuira
Tel. 081 255 54 53
lmv@somedia.ch
www.lmv.gr.ch

L'uffizi per la scola populara ed il sport (USS) e la Somedia Production SA sa legran da bleras visitas en l'exposiziun dals meds d'instrucziun u en il nov webshop. Il sectur dals meds d'instrucziun dal USS ed il team da la Somedia Production SA stattan gugent a Vossa disposiziun per dumondas davart meds d'instrucziun.


Infurmaziuns:
Josy Marie Künzler, manadra dal sectur meds d'instrucziun, uffizi per la scola populara ed il sport, tel. 081 257 22 61, e-mail Josy.Kuenzler@avs.gr.ch  


Gremi: uffizi per la scola populara ed il sport
Funtauna: rg uffizi per la scola populara ed il sport