L'onn 2017/2018 presidiescha il Grischun la cuminanza da lavur da las regiuns alpinas (ARGE ALP). En il center stat il tema da la forza idraulica en il territori alpin. Ina seria da contribuziuns da video dat invistas interessantas da la producziun d'electricitad e mussa l'impurtanza da la forza idraulica per il territori alpin.

L'utilisaziun da la forza idraulica per producir current electrisescha la populaziun grischuna dapi passa 100 onns. Al territori alpin ha ella purtà svilup, bainstar e facilitaziuns en la vita da mintgadi. L'emprima ovra idraulica da la Svizra è vegnida construida l'onn 1879 a San Murezzan e strusch ina regiun da las Alps ha passentà dals onns 1950 fin 1970 in tal boom dad ovras novas sco il Grischun. La construcziun d'ovras electricas è stada ina prestaziun tecnica excellenta ch'è stada pussaivla grazia a millis da lavurants – per il solit talians.
La forza idraulica è ina da las paucas atgnas resursas che las regiuns alpinas han e da las qualas ellas pon trair profit per l'economia publica. Il niz direct èn las plazzas da lavur gist er en regiuns perifericas, las investiziuns, da las qualas profitan er ulteriurs secturs economics dal territori alpin, l'indemnisaziun da l'utilisaziun da l'aua e furniziuns favuraivlas d'energia. In niz indirect genereschan las ovras idraulicas cun la construcziun e cun il mantegniment da numerusas infrastructuras che han stgaffì e che stgaffeschan la basa per svilups turistics, che servan però er a dustar donns tras eveniments da la natira (averturas cun viasfier, tunnels, engrondiments da vias, construcziuns da rempars e d'ovras da protecziun e.u.v.). Quest niz general che resulta da la forza idraulica presta ina contribuziun impurtanta al mantegniment da basas da viver stabilas en las regiuns alpinas ed uschia a l'autodeterminaziun da la populaziun.

Ils cumenzaments da la forza idraulica en in video
In video nov da la chanzlia chantunala mussa ils cumenzaments da la forza idraulica en il Grischun. L'exempel da la Bregaglia mussa co che la forza idraulica funcziuna sco catalisatur per il svilup dal Grischun. Plinavant sa drizza l'egliada vers enavant cun la dumonda tge impurtanza che la forza idraulica vegn ad avair en il futur.


Tut las infurmaziuns davart l'onn presidial dal Grischun èn consultablas sut www.gr.ch/argealp, ed infurmaziuns generalas davart la ARGE ALP stattan a disposiziun sut www.argealp.org.


Infurmaziuns:
president da la regenza Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch  


Gremi: ARGE ALP / chanzlia chantunala dal Grischun
Funtauna: rg ARGE ALP / chanzlia chantunala dal Grischun