Navigation

Inhaltsbereich

Cur che l'alcohol daventa in medicament

  • Erste Mitteilung
  • Neuen Beitrag einfügen
Tschertas persunas prendan alcohol per curar malsognas psichicas e fisicas. Al di d'acziun naziunal davart ils problems d'alcohol dals 24 da matg 2018 rendan las organisaziuns grischunas da prevenziun e cussegliaziun da dependenza attent a lur purschidas d'agid. L'alcohol n'è numnadamain betg in med adattà per curar malsognas.

Decleraziuns da persunas pertutgadas conferman quant grond ch'il malesser po esser. Il consum d'alcohol gida a supportar l'isolaziun, a dumagnar pensums difficils a la plazza da lavur u a chattar il curaschi da bandunar sia chasa. I dat persunas ch'èn bunas da supportar lur temas mo cun alcohol. Il consum d'alcohol po mitigiar a curta vista il stress u las temas e po rinforzar uschia l'aspectativa positiva envers l'alcohol. Quai favurisescha in consum a lunga vista, che po puspè svegliar novas temas u rinforzar temas ch'èn gia avant maun. In circul vizius: Tant la tema sco er l'alcoholissem influenzeschan en moda negativa l'andament ed il tractament da mintgamai l'autra malsogna.

L'alcohol n'è betg in med per curar malsognas

Il facit da spezialistas e spezialists è cler e net: L'alcohol n'è betg in med adattà per curar malsognas. Persunas che han ina malsogna psichica u dolurs s'exponan a la ristga da sviluppar tras il consum d'alcohol in excess u da rinforzar lur malsogna.

Purschidas d'agid en il Grischun
Tgi che pertschaiva sintoms sumegliants tar sai, tar ses confamigliars u tar persunas da ses context professiunal, chatta agid tar la crusch blaua dal Grischun, tar ils servetschs psichiatrics dal Grischun sco er tar ils servetschs socials regiunals. Questas purschidas d'infurmaziun e da cussegliaziun gratuitas e betg liantas mussan vias pussaivlas per ina midada sanadaivla – er per persunas pertutgadas da mintga vegliadetgna, per lur confamigliaras e confamigliars ed er per spezialistas e spezialists. Tgi che vul restar anonim, po sa laschar cussegliar en moda discreta sin il portal online da SafeZone (www.safezone.ch), tranter auter cun conversaziuns d'agid a sasez, cun ina cussegliaziun per e-mail e cun forums infurmativs.

Resumaziun da tut las purschidas d'agid en il Grischun: https://bischfit.ch/d/alkoholprobleme/  
Ulteriuras activitads: www.aktionstag-alkoholprobleme.ch  


Infurmaziuns:

Denise Rudin, uffizi da sanadad, manadra da la partiziun "promoziun da la sanadad e prevenziun", vicemanadra dal program grischun cunter l'alcohol, tel. 081 257 64 02 u 078 746 42 20, e-mail: Denise.Rudin@san.gr.ch  


Gremi: uffizi da sanadad
Funtauna: rg uffizi da sanadad
Neuer Artikel