Navigation

Inhaltsbereich

L'uffizi per la natira e l'ambient fa in'exposiziun publica dals inventaris

  • Erste Mitteilung
  • Neuen Beitrag einfügen
L'onn 2015 ha l'uffizi federal d'ambient (UFAM) fatg in'audiziun davart l'actualisaziun dals inventaris federals en il sectur da la protecziun dals biotops. Pervia da numerus sbagls en las datas federalas, han la regenza grischuna e la cussegliera federala Doris Leuthard decidì cuminaivlamain da rectifitgar las palids planivas ed ils prads sitgs dal Grischun. Perquai ch'er l'inventari chantunal dals biotops basegna ina revisiun, fa il chantun ussa – sut la direcziun da l'uffizi per la natira e l'ambient (UNA) – a medem temp in'exposiziun publica dals inventaris dals biotops federals e chantunals. En il rom da questa exposiziun pon tut las parts pertutgadas s'exprimer davart ils fatgs.

I n'è betg pussaivel da pudair mantegnair las plantas ed ils animals selvadis ed indigens senza proteger lur spazis da viver (biotops) e questa incumbensa surpiglia il UNA en moda conscienziusa. La protecziun da las spezias e dals biotops cumpiglia la protecziun, la tgira e la promoziun dals spazis da viver da la flora e fauna selvadia en sia multifariadad natirala ed istorica. La premissa per ina protecziun da la natira effizienta ed effectiva è ina savida uschè cumplessiva sco pussaivel da las spezias ch'i dat en il chantun, da lur pretensiuns envers il spazi da viver e cunzunt da la situaziun dals spazis da viver ils pli impurtants ed ils pli prezius ecologicamain. Quest ultim è il cuntegn dals inventaris dals biotops federals e chantunals.

Il mantegniment dals biotops è er cumbinà cun restricziuns d'utilisaziun. Per quest motiv èn ils inventaris dals biotops federals e chantunals vegnids preschentads mintgatant sco impediments. Uschia stat en il focus la chapientscha per la lavur cuminaivla da las autoritads e da las parts pertutgadas a favur d'in spazi da viver duraivel. En il rom da l'exposiziun publica duai perquai vegnir mess a disposiziun a tut las persunas pertutgadas ed a tut las instituziuns in process effizient per rectifitgar – ensemen cun il UNA – ils inventaris dals biotops e per als actualisar cun success.

Il UNA porscha in agid cumplessiv per tut las parts pertutgadas

Tgi ch'è pertutgà da l'inventari ha ussa la pussaivladad da controllar las inscripziuns respectivas en l'inventari e da communitgar sias reclamaziuns davart ils fatgs directamain al UNA fin ils 24 d'avust 2018. Il UNA ha mess a disposiziun per quest intent ina instrucziun sin www.anu.gr.ch/biotope2018, che accumpogna il process d'annunzia. Cun questa instrucziun po ina posiziun davart ina inscripziun en l'inventari vegnir deponida en moda simpla ed independenta sin la pagina d'internet http://map.geo.gr.ch/. Perquai ch'il UNA dat gronda paisa a l'agid en questa chaussa, vegn purschì fin l'avust in sustegn supplementar per il cas ch'i dat dumondas en furma d'ina "hotline" sut il numer 081 257 29 40.

Tema spinus – transparenza uschè gronda sco pussaivel
Gia ordavant ha il UNA contactà diversas parts pertutgadas en chaussa. Uschia èn ins per exempel entrà en contact cun las telefericas dal Grischun e cun l'uniun purila grischuna. Sin questa via duai vegnir meglierada la chapientscha vicendaivla per la protecziun da la natira en general e per la valur dals inventaris en spezial. Cun las mesiras accumpagnantas menziunadas duai l'annunzia survegnir in aspect simpel "orientà a la clientella" e transparent.

L'exposiziun publica che vegn lantschada ils 24 da matg 2018 permetta ussa a tut las parts pertutgadas da pretender in'examinaziun dals fatgs, sche l'inventari demussa circumferenzas dals biotops cumprovadamain faussas. Las propostas vegnan evaluadas successivamain e tractadas correspundentamain als resultats en l'examinaziun dals fatgs. Il UNA vegn ad infurmar il settember davart ils resultats da l'exposiziun publica, e quai a chaschun d'ina conferenza da medias.


Controlla da las inscripziuns en ils inventaris

Instrucziun: www.anu.gr.ch/biotope2018
Hotline: 081 257 29 40

Pagina d'internet per l'annunzia: http://map.geo.gr.ch/


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch
- Remo Fehr, manader da l'uffizi per la natira e l'ambient, tel. 081 257 29 41, e-mail Remo.Fehr@anu.gr.ch  


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient
Neuer Artikel

Video

Object reference not set to an instance of an object.