Sin invit da la regenza grischuna ha la regenza dal chantun Son Gagl visità oz suentermezdi il chantun Grischun. En il rom dal discurs da lavur constructiv a Cuira èn vegnids tractads differents temas interchantunals.

Sin sia visita en il chantun Grischun è la regenza da Son Gagl vegnida manada dal president da la regenza Stefan Kölliker. El è vegnì accumpagnà dals cussegliers guvernativs Martin Klöti, Bruno Damann, Benedikt Würth, Marc Mächler e Fredy Fässler, da la cussegliera guvernativa Heidi Hanselmann sco er dal chancelier Canisius Braun.

Las regenzas dals chantuns Son Gagl e Grischun èn sa scuntradas ad in discurs da lavur a Cuira. Els han tractà tranter auter il tema dal project da revitalisaziun per schlargiar il Rain tranter Maiavilla e Bogn Ragaz. Tranter Maiavilla e Bogn Ragaz duai vegnir permess ils proxims onns da schlargiar il Rain sin ina lunghezza da var 3 kilometers, quai cun las finamiras da garantir la protecziun cunter aua gronda, da pussibilitar la creaziun d'in spazi da viver per animals e per plantas e d'augmentar la valur da la zona da recreaziun locala en la regiun turistica.

Ultra da quai ha il tema luf e la dumonda co ir enturn en il futur cun il svilup da la populaziun dal luf procurà per in barat interessant. Medemamain vegnids tematisads èn ils campiunadis mundials da mastergns World Skills e Swiss Skills sco er la scola auta spezialisada da la Svizra orientala e la SATE a Cuira.

Ultra dal discurs da lavur ha gì lieu ina visita guidada tras la collecziun dal museum d'art dal Grischun. Suenter è ina tschaina cuminaivla da las duas delegaziuns stada sin il program.

Fotografia agiuntada:

Il president da la regenza Mario Cavigelli beneventa ses collega d'uffizi da Son Gagl Stefan Kölliker a Cuira.

Las regenzas dals chantuns Son Gagl e Grischun èn sa scuntradas ad in discurs da lavur a Cuira.


Gremi: regenza
Funtauna: rg chanzlia chantunala