Navigation

Inhaltsbereich

  • Erste Mitteilung
  • Neuen Beitrag einfügen
Per las elecziuns da la regenza da dumengia, ils 10 da zercladur 2018, è vegnida fatga d'uffizi ina verificaziun da las vuschs pervia da la differenza da vuschs tranter l'ultim candidat elegì e l'emprim candidat betg elegì. Tenor la verificaziun ha Jon Domenic Parolini survegnì 15 867 vuschs e Walter Schlegel 15 836 vuschs. La verificaziun conferma pia il resultat da las elecziuns da la regenza da la dumengia passada.

Ils 13 da zercladur 2018 ha la regenza grischuna ordinà per las elecziuns da la regenza dals 10 da zercladur 2018 ina verificaziun da las vuschs areguard ils resultats dals candidats Jon Domenic Parolini und Walter Schlegel. Quai sa basond sin la lescha davart ils dretgs politics en il chantun Grischun, tenor la quala las vuschs ston vegnir verifitgadas d'uffizi, sche la differenza tranter l'ultim candidat elegì e l'emprim candidat betg elegì è pli pitschna che 0,3 pertschient dals cedels electorals consegnads valaivels.

Suenter ch'il material electoral da tut las 108 vischnancas grischunas è stà avant maun, ha la chanzlia chantunala dumbrà anc ina giada las vuschs per incumbensa da la regenza. Quai dals 13 fin ils 15 da zercladur 2018 a Cuira. La verificaziun ha gì lieu tenor ina procedura cleramain structurada e cun agid da controllas, uschia che la correctadad da la verificaziun è stada garantida. Ils dus candidats pertutgads han gì la pussaivladad d'observar sezs la verificaziun ubain da trametter ina represchentanza. La verificaziun da las vuschs ha purtà il suandant resultat chantunal:

- Jon Domenic Parolini: 15 867
- Walter Schlegel: 15 836

La regenza ha prendì enconuschientscha dal resultat da la verificaziun da las elecziuns da la regenza. Il resultat da la verificaziun vegn publitgà ils 18 da zercladur 2018 sco resultat uffizial en il fegl uffizial chantunal (www.kantonsamtsblatt.gr.ch) (resultats communals midads vegnan marcads). Il medem di vegn il resultat detaglià da la verificaziun da las vuschs publitgà en l'internet sut www.gr.ch/rrw.


Infurmaziuns:

Daniel Spadin, chancelier, chanzlia chantunala dal Grischun, tel. 081 257 22 21, e-mail Daniel.Spadin@staka.gr.ch


Gremi: regenza
Funtauna: rg chanzlia chantunala
Neuer Artikel