Navigation

Inhaltsbereich

  • Erste Mitteilung
  • Neuen Beitrag einfügen
Malgrà la tendenza favuraivla durant l'onn 2017 è il turissem grischun sa sviluppà ils ultims onns tut en tut en moda pauc allegraivla. Il studi "Benchmarking dal turissem – L'economia da turissem grischuna en la cumparegliaziun internaziunala" resumescha ils resultats ils pli impurtants ch'èn vegnids elavurads per il Grischun en il rom d'in program da benchmark da plirs onns.

Dapi passa 12 onns sa participescha il chantun Grischun al project Innotour "Program internaziunal da benchmarking per il turissem svizzer" che vegn realisà da l'institut da perscrutaziun economica BAK Economics per incumbensa dal secretariat da stadi per l'economia SECO e da tut las regiuns da vacanzas svizras impurtantas. La participaziun dal chantun permetta da registrar e d'analisar cuntinuadamain e sistematicamain la capacitad economica dal turissem grischun en cumparegliaziun cun regiuns da vacanzas e cun destinaziuns svizras ed estras. Las infurmaziuns centralas vegnan reunidas en in unic lieu, vegnan analisadas e messas a disposiziun als acturs turistics.

Il rapport ch'è ussa avant maun, resumescha ord vista dal Grischun ils resultats ils pli impurtants dal program dals ultims onns. El dilucidescha las midadas a lunga vista en la structura da dumonda e da purschida e cunzunt er las consequenzas dal curs minimal dal franc sco er da sia aboliziun sin la dumonda dals martgads ils pli differents.

Internaziunalisaziun relativamain pitschna
Las frequenzas da l'Europa dal vest, en spezial da la Germania, ch'èn stadas gia avant istoricamain bassas, èn dadas ensemen anc ina giada en il Grischun suenter l'aboliziun dal curs minimal il cumenzament da l'onn 2015. Tranter l'onn 2010 e l'onn 2016 è la quota da pernottaziuns da giasts da l'Europa dal vest sa reducida tut en tut da 43 pertschient a mo pli bun 30 pertschient.

Augments permanents da giasts da fieras lontanas e da martgads creschents sin in nivel modest n'han insumma betg pudì cumpensar questas perditas en il Grischun. Gist en cumparegliaziun cun autras regiuns da vacanzas da la Svizra è l'internaziunalisaziun anc pauc progredida. L'impurtanza pli e pli ferma dal martgà svizzer per il turissem grischun ha pudì vegnir cuntanschida pervia da la deblezza dals auters martgads, ma senza atgna creschientscha.
-
Part da las pernottaziuns en l'hotellaria tenor martgads da derivanza en %, l'agregat "Europa dal vest" cumpiglia ils 8 martgads tradiziunals da l'Europa dal vest (CH, DE, FR, IT, AT, NL, BE, UK, mintgamai senza l'intern dals pajais), colonna lada = 2016, colonna stretga = 2000
Funtauna: Divers uffizis da statistica, BAK Economics

Svilup da las singulas destinaziuns
Per mesirar e per cumparegliar sin plaun internaziunal il success da singulas destinaziuns dovra il program il "BAK TOPIndex". Quest index sa cumpona da trais facturs centrals: il svilup da las quotas dal martgà (valitaziun a 20 pertschient), l'occupaziun da las capacitads d'alloschament (valitaziun a 50 pertschient) e la productivitad d'ina destinaziun (valitaziun a 30 pertschient). Il "BAK TOPIndex" po vegnir calculà per l'entir onn turistic, ma er separadamain per la stagiun da stad e per la stagiun d'enviern.

Ina cumparegliaziun da la performance da l'onn 2010 e da l'onn 2016 na dat betg in maletg positiv: Las destinaziuns grischunas han stuì registrar perditas evidentas. Praticamain tut las destinaziuns èn sa pegiuradas en tuttas duas stagiuns en il "BAK TOPINDEX", Samignun ha pudì meglierar levamain sia posiziun da stad.
-
"BAK TOPINDEX" Stagiun da stad e d'enviern 2016 (blau stgir) e 2010 (verd), valur media dal territori alpin mintgamai = 3,5
Funtauna: BAK Economics

Questa ed ulteriuras analisas mussan per l'ina, quant difficil che l'ambient economic dals ultims onns è stà per il turissem grischun. Per l'autra inditgeschan las cumparegliaziuns cun destinaziuns da la Svizra e da l'exteriur dentant er che la midada structurala permanenta en l'economia d'alloschament duess avair in effect positiv sin la performance, perquai ch'i resultan damain manaschis, percunter dentant manaschis pli gronds e da meglra qualitad. En tge dimensiun ch'il svilup cleramain pli favuraivel da las frequenzas dapi l'onn 2017 sa manifestescha er gia en il benchmark internaziunal, vegnan a mussar las lavurs en curs.

Analisas da blers ulteriurs indicaturs e da facturs cumpetitivs relevants, sco per exempel da las purschidas da stad e d'enviern en las singulas destinaziuns, sco er explicaziuns davart la destinaziun urbana da Cuira en cumparegliaziun cun concurrents sumegliants, cumpletteschan las investigaziuns. Tras las activitads voluminusas da benchmarking survegnan ils furniturs da prestaziuns turisticas meglras enconuschientschas da lur situaziun da concurrenza, quai che po facilitar l'agen posiziunament. Tras l'analisa da las fermezzas e da las deblezzas resultan plinavant puncts da partenza per eventualas mesiras d'optimaziun. Tras las enconuschientschas obtegnidas duain ils purtaders da decisiuns en il turissem grischun pudair prender mesiras che sa basan sin ils fatgs.

Rapport cumplet: Benchmarking dal turissem – L'economia da turissem grischuna en la cumparegliaziun internaziunala (matg 2018)


Infurmaziuns:
Eugen Arpagaus, manader da l'uffizi per economia e turissem, tel. 081 257 23 77, e-mail: Eugen.Arpagaus@awt.gr.ch


Gremi: uffizi per economia e turissem
Funtauna: rg uffizi per economia e turissem
Neuer Artikel