Navigation

Inhaltsbereich

Prescripziuns da chatscha 2018: Gronds plans da prelevaziun er suenter in enviern dir

  • Erste Mitteilung
  • Neuen Beitrag einfügen
Er suenter l'enviern dir 2017/2018 èn ils effectivs da selvaschina d'ungla anc adina buns fin gronds. Els ston vegnir regulads vinavant consequentamain cun la chatscha per ch'els sajan natirals ed adattads al spazi da viver e per ch'ils donns da selvaschina vi dal guaud e vi da las culturas agriculas possian vegnir reducids ad ina dimensiun supportabla. Pervia da quai ha la regenza puspè relaschà gronds plans da prelevaziun per l'onn 2018, en spezial per tschiervs.

Dapi l'onn 2013 chaschunan ils envierns miaivels ch'ils effectivs da tschiervs, da chavriels e da capricorns s'augmentan fermamain ed in zic main er quels dals chamutschs. Ils animals ch'èn vegnids sajettads ed examinads l'onn passà han gì ina cundiziun cleramain main buna ch'ils animals dals onns avant. Quai è declerabel cun las cundiziuns da magliar plitgunsch suboptimalas da la stad passada, ma er cun in augment d'animals pli flaivels en l'effectiv sco consequenza dals envierns miaivels 2013 fin 2017.

Gronds effectivs da selvaschina d'ungla malgrà in grond dumber d'animals disgraziads
Ils gronds effectivs da selvaschina, la cundiziun main buna e las relaziuns diras da l'enviern 2018 han chaschunà – cumpareglià cun ils onns precedents – dumbers fitg gronds d'animals disgraziads en tut il chantun: fin ils 25 da matg 2018 èn vegnids registrads 2342 tschiervs, 3162 chavriels, 972 chamutschs e 303 capricorns.
A chaschun da la taxaziun da notg èn vegnids quintads 13 030 tschiervs. Quai èn – malgrà il grond dumber d'animals disgraziads – 1402 dapli che l'onn precedent. Dumbers pli gronds èn vegnids registrads cunzunt en quellas regiuns che han gì ina immigraziun da chantuns e da pajais cunfinants e da provinzas vischinas. Er questa primavaira ston ins far quint cun in effectiv da var 16 500 tschiervs (onn precedent: 16 600). Tar ils chavriels ha l'enviern percunter chaschunà ina clera reducziun da l'effectiv. Tar ils capricorns e tar ils chamutschs furneschan las dumbraziuns da stad ch'èn anc en curs respectivamain las dumbraziuns d'atun respostas fidaivlas davart l'autezza definitiva dals effectivs.

Regulaziun consequenta tras la chatscha

En tschertas regiuns han ils effectivs da tschiervs e da chavriels surpassà lur grondezza supportabla ils ultims onns per differents motivs. Quai ha chaschunà dapli conflicts cun il guaud e cun l'agricultura. La regulaziun consequenta tras la chatscha, en spezial dals effectivs da tschiervs e da chavriels, sto vegnir cuntinuada. Ella è – ensemen cun las relaziuns nundisturbadas en ils quartiers d'enviern e cun las bunas pastgiras da stad e d'atun – la premissa la pli impurtanta per che la selvaschina possia surviver las stretgas da l'enviern. Resguardond las differenzas regiunalas vegn il plan da prelevaziun augmentà levamain da 5370 a 5430 tschiervs. L'effectiv da chavriels n'è enconuschentamain betg eruibel. Perquai sa basa la planisaziun da prelevaziun tar questa spezia da selvaschina sin ils bucs sajettads il settember – in indicatur fidaivel per l'effectiv. Er tar ils chamutschs na vegnan prescrits nagins plans da prelevaziun quantitativs. Las prescripziuns permettan d'intervegnir pli fitg en quellas regiuns, nua ch'ils effectivs èn gronds. Per ils capricorns percunter vala in plan da prelevaziun fitg detaglià ch'è vegnì approvà da la confederaziun l'avrigl 2018.

Concepì da nov las prescripziuns da chatscha 2018

Las prescripziuns da chatscha en la furma vertenta, vul dir uschia sco ch'ellas èn vegnidas publitgadas fin ussa en il fegl uffizial dal chantun Grischun e surdadas a las chatschadras ed als chatschaders a chaschun da la retratga da la patenta da chatscha, vegnan publitgadas da nov en la collecziun uffiziala da leschas (CUL) sco ordinaziun da la regenza. Cun questa chaschun vegnan concepidas da nov er l'apparientscha e la structura dal cuntegn da l'ediziun stampada da questas prescripziuns per las chatschadras ed ils chatschaders. En quest connex sa tracti da la quarta midada da l'apparientscha dapi l'onn 1944. Las prescripziuns da chatscha vegnan publitgadas en la CUL per l'emprima giada electronicamain en tuttas trais linguas chantunalas. La 75. ediziun da las prescripziuns da chatscha stampadas vegn surdada a las chatschadras ed als chatschaders en tudestg u en talian ensemen cun la patenta da chatscha.


Infurmaziuns:

- president da la regenza dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- dr. Adrian Arquint, manader da l'uffizi da chatscha e pestga, tel. 081 257 38 91, e-mail Adrian.Arquint@ajf.gr.ch


Gremi: departament da construcziun, traffic e selvicultura
Funtauna: rg departament da construcziun, traffic e selvicultura
Neuer Artikel