Navigation

Inhaltsbereich

La regenza ha deliberà il rapport davart la realisaziun d'in center da scola auta per la SATE a Cuira

  • Erste Mitteilung
  • Neuen Beitrag einfügen
La regenza propona al cussegl grond da realisar in center da scola auta per la scola auta da tecnica ed economia (SATE) en la citad da Cuira sin l'areal Pulvermühle e da prevair per quai ina investiziun brutta da 125 milliuns francs. Plinavant ha la nova structuraziun da la scola auta spezialisada da la Svizra orientala (SASSO) per consequenza ch'i sto vegnir abolida la cunvegna dals purtaders da la scola auta per tecnica a Buchs NTB (anteriuramain "Neu Technikum Buchs") tranter ils chantuns Son Gagl e Grischun sco er il Principadi da Liechtenstein.

Ils 10 da schaner 2017 ha la regenza decidì da construir in center da scola auta a Cuira. Suenter èn vegnids examinads differents lieus pussaivels en vista a la disponibladad da las surfatschas da terren, en vista a las pussaivladads d'avertura e d'engrondiment resguardond aspects da la planisaziun dal territori sco er en vista als custs ed a la durada da la realisaziun. Sin fundament da l'analisa dals lieus propona la regenza al cussegl grond da realisar in center da scola auta sin l'areal Pulvermühle, nua che la chasa da scola exista gia. Quest lieu ha il temp da realisaziun il pli curt ed ils custs ils pli bass. Sch'il project progredescha optimalmain, pudess vegnir approvà in credit da construcziun inclusiv la votaziun dal pievel fin l'onn 2022 e realisà il center da scola auta fin l'onn 2025.

Ina scola auta effizienta augmenta la cumpetitivitad

La construcziun d'in center da scola auta ha ina fitg gronda impurtanza ed urgenza per il chantun Grischun ord vista da la furmaziun, da la perscrutaziun e da l'innovaziun. Ils fatgs structurals dal chantun han per consequenza che l'economia grischuna sa chatta sut la media naziunala pertutgant la capacitad da prestaziun e d'innovaziun. Pervia da la mancanza da persunal qualifitgà, particularmain en las disciplinas tecnicas e da scienza natirala, na pon las interpresas industrialas grischunas betg crescher sco spetgà. En quest ambient economicamain pretensius è ina scola auta effizienta in actur impurtant per augmentar la cumpetitivitad da l'economia publica dal Grischun.

La confederaziun empermetta 30 milliuns francs
I vegn quintà cun investiziuns bruttas da 125 milliuns francs, cun ina contribuziun federala da circa 30 milliuns francs sco er cun in retgav da 5 milliuns francs ord la vendita d'immobiglias da la SATE Cuira. Da quai resulta in basegn da meds finanzials da vart dal chantun da 90 milliuns francs. Quest import duai vegnir mess a disposiziun ordaifer la directiva da la politica da finanzas dal cussegl grond concernent las investiziuns nettas, ed i duai vegnir furmada ina reserva correspundenta sin donn e cust dal quint 2018. La finanziaziun dal center da scola auta sto vegnir qualifitgada – ord vista dal dretg da finanzas – sco expensa nova respectivamain sco expensa libramain fixabla ed è suttamessa al referendum da finanzas obligatoric.

Distatgament da la federaziun da scolas autas
La SASSO vegn organisada da nov e duai cumenzar ses manaschi operativ il 1. da settember 2020. La SATE Cuira vul sa distatgar da la federaziun da la SASSO. Sin il termin da l'avertura dal manaschi da la nova SASSO sto ultra da quai vegnir schliada la cunvegna dals purtaders da la scola auta per tecnica a Buchs NTB. Perquai vegni proponì al cussegl grond da metter ord vigur – sin il termin da la partenza da la nova SASSO – il conclus dal cussegl grond dal 1. da zercladur 1967 davart la participaziun dal chantun Grischun.

Igl è previs ch'il cussegl grond tractia la fatschenta en la sessiun d'october 2018.


Agiunta:
missiva


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch
- president da la regenza dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: regenza
Funtauna: rg chanzlia chantunala
Neuer Artikel