Navigation

Inhaltsbereich

  • Erste Mitteilung
  • Neuen Beitrag einfügen
La cumissiun per giustia e segirezza dal cussegl grond (CGS) ha predeliberà las missivas da la regenza tar la revisiun parziala da la lescha da polizia, tar la realisaziun da la revisiun da la lescha federala davart las multas disciplinaras e tar la desditga da la commembranza dal concordat davart las prestaziuns da segirezza privatas. Ils projects che han tuts chattà il sustegn da la cumissiun vegnan tractads en la sessiun d'avust 2018 dal cussegl grond.

Revisiun parziala da la lescha da polizia
Questa fatschenta è vegnida tractada sut la direcziun dal president da la cumissiun, il deputà Reto Crameri. Sa participà è er il cusseglier guvernativ Christian Rathgeb. Ils motivs per la revisiun parziala da la lescha da polizia èn las experientschas fatgas dapi l'entrada en vigur dal cudesch da procedura penala svizzer dals 5 d'october 2007, differentas intervenziuns parlamentaras (en spezial las incumbensas Augustin e Felix) e las enconuschientschas obtegnidas dal rapport da polizia 2015plus. Ch'ina revisiun saja necessaria n'è betg stà en discussiun per la cumissiun, uschia ch'ella è entrada unanimamain en il project. Er la finamira dal project è incontestada per la maioritad da la cumissiun, en spezial la creaziun da basas legalas cleras per las mesiras da surveglianza secretas e preventivas che vegnan resguardadas sco instrument da la polizia da segirezza per pudair far frunt a periclitaziuns da la segirezza publica e da l'urden public avant ina procedura d'investigaziun da dretg penal.
En la tractativa detagliada ha la cumissiun fatg intginas correcturas en il sboz da la lescha. Empè da designar la dretgira administrativa sco autoritad d'approvaziun per tschertas mesiras da surveglianza preventivas, sco quai ch'igl è vegnì proponì da la regenza, propona ina maioritad considerabla da la cumissiun la dretgira chantunala da mesiras repressivas per questa incumbensa. La dretgira chantunala da mesiras repressivas ch'è er cumpetenta per las mesiras da surveglianza sumegliantas da la procedura penala, è – or da l'optica da la maioritad da la cumissiun – adattada meglier per il giudicament material che la dretgira administrativa. Ina minoritad da la cumissiun refusa la pussaivladad da survegliar il spazi public cun l'identificaziun da persunas. Cuntrari a la missiva propona ina maioritad da la cumissiun l'introducziun d'in scumond da sa mascrar. Beneventà vegn cleramain il sustegn expressiv per la collavuraziun tranter la polizia chantunala e las vischnancas. Medemamain sustegna la cumissiun unanimamain la procuraziun d'infurmaziuns e surveglianza relativas a l'acziun (diever da dronas e da bodycams).
La CGS propona al cussegl grond d'acceptar la revisiun parziala da la lescha da polizia.

Realisaziun da la revisiun da la lescha federala davart las multas disciplinaras
Ultra da quai ha la CGS predeliberà la missiva da la regenza tar la realisaziun da la revisiun da la lescha federala davart las multas disciplinaras. Er il cusseglier guvernativ Christian Rathgeb è sa participà a la sesida. Cun reveder la lescha davart las multas disciplinaras l'onn 2016 ha la confederaziun extendì l'applicaziun da la procedura da multas disciplinaras simpla e nunbirocratica sin ulteriuras leschas. Il chantun sto designar las autoritads ed ils organs ch'èn cumpetents per quests causals. Igl è stà incontestà en la cumissiun d'entrar en il project. Plinavant n'ha la cumissiun er betg contestà d'attribuir la cumpetenza da realisar la procedura da multas disciplinaras a las vischnancas, sco quai che la regenza ha proponì. Pertutgadas da quai èn differentas leschas che ston vegnir adattadas (lescha introductiva tar il cudesch da procedura penala svizzer, lescha da sanadad, lescha davart la protecziun da l'ambient, lescha davart il guaud).
La CGS propona al cussegl grond d'acceptar la lescha davart la realisaziun da la revisiun parziala da la lescha federala davart las multas disciplinaras.


Desditga da la commembranza dal concordat davart las prestaziuns da segirezza privatas
Sco terza fatschenta ha la CGS predeliberà la missiva da la regenza tar la desditga da la commembranza dal concordat davart las prestaziuns da segirezza privatas, medemamain en preschientscha dal cusseglier guvernativ Christian Rathgeb. En il project è la cumissiun entrada unanimamain. La cumissiun sustegna unanimamain l'opiniun da la regenza, che la chargia finanziala supplementara ed in pegiurament da la posiziun sin il martgà da las interpresas e dals emploiads da segirezza grischuns envers tals da chantuns che na sa participeschan betg al concordat excludia la commembranza dal concordat davart las prestaziuns da segirezza privatas. La cumissiun beneventa unanimamain la cumpetenza ch'il chantun Grischun obtegna puspè suenter ch'el è sortì dal concordat davart las prestaziuns da segirezza privatas, da daventar activ sin plaun legislativ en il sectur dals servetschs da segirezza privats, sch'el vesa ina necessitad per quai.
La CGS propona al cussegl grond da desdir la commembranza dal concordat davart las prestaziuns da segirezza privatas e da dar a la regenza l'autorisaziun correspundenta.


Infurmaziuns:

Reto Crameri, president da la cumissiun per giustia e segirezza dal cussegl grond, tel. 079 727 15 68


Gremi: secretariat dal cussegl grond
Funtauna: rg secretariat dal cussegl grond
Neuer Artikel