Navigation

Inhaltsbereich

Communicaziun da la regenza dals 30 d'avust 2018

  • Erste Mitteilung
  • Neuen Beitrag einfügen
La regenza ha prendì posiziun tar las midadas planisadas da la confederaziun en l'ordinaziun da posta ed ha approvà in nov studi da bachelor a la scola d'hotellaria a Passugg. Plinavant ha ella pussibilità l'engrondiment d'ina setgentaria da charn a Curaglia.

Il provediment da basa da la posta sto esser garantì en tut las regiuns
La regenza ha prendì posiziun tar in project da consultaziun dal departament federal per ambient, traffic, energia e communicaziun (DATEC). Cun las midadas proponidas en l'ordinaziun da posta vul il cussegl federal meglierar la cuntanschibladad d'uffizis postals e d'agenturas da la posta svizra. En quest connex duain basegns regiunals e circumstanzas regiunalas vegnir resguardads pli fitg tar il provediment da basa cun servetschs da posta e dal traffic da pajaments. Ultra da quai duai la communicaziun tranter la posta svizra ed ils chantuns sco er las vischnancas vegnir intensivada. Las adattaziuns da l'ordinaziun duain gidar che l'economia e la populaziun possian profitar er en l'avegnir d'excellents servetschs da posta e dal traffic da pajaments.
Per la regenza grischuna muntan las midadas proponidas da la confederaziun in meglierament substanzial envers la situaziun actuala. Ella beneventa oravant tut la regiunalisaziun dals criteris da la cuntanschibladad sin plaun dals chantuns. Quai è ina buna via per reducir las differenzas regiunalas ch'existan tar la qualitad dal provediment sco er il sutprovediment dals territoris alpins e dals territoris rurals.
En sia posiziun renda la regenza però er attent ad ulteriurs giavischs dal chantun Grischun. En il senn d'in provediment postal da basa cumplessiv pretenda ella che agenturas porschian ina cumpensaziun cumplaina per uffizis postals. La regenza spetga che quest princip vegnia realisà en vista a las pussaivladads da far pajaments en daner blut en agenturas. En spezial per interpresas pitschnas e mesaunas (IPM) è la pussaivladad dal traffic da pajaments en daner blut in servetsch impurtant. En vischnancas cun agenturas porscha la posta dapi l'onn 2017 il traffic da pajaments sco servetsch a domicil. Quest servetsch stat a disposiziun a la clientella privata, ma betg a la clientella da fatschenta. La disponibladad d'in tal servetsch è però per IPM e per l'ulteriura clientella da fatschenta en regiuns senza uffizis postals in factur impurtant da l'attractivitad dal lieu. Pervia da quai supplitgescha la regenza la posta da preschentar propostas da soluziun, co che quest servetsch possia vegnir furnì en l'avegnir en tut las regiuns en il senn dal provediment da basa.

Documents da consultaziun DATEC

Approvà nov studi da bachelor a la scola d'hotellaria a Passugg
La regenza ha concedì a la Swiss School of Tourism and Hospitality SA (SSTH SA) a Passugg ina permissiun da manaschi per il studi da bachelor da l'Ecole Hôtelière de Lausanne (EHL).
La direcziun da studi che cumenza per l'emprima giada il settember 2018 sa numna "bachelor of science in international hospitality management". Questa purschida sa drizza ad absolventas ed ad absolvents d'hotelier-restauratur cun diplom SSS, dals quals il diplom SSS vegn renconuschì da l'Haute école spécialisée de Suisse occidentale (HES-SO) cun 90 puncts da credit (ECTS). Il program da bachelor en englais sa drizza tenor il plan d'instrucziun da la EHL. Ils emprims dus semesters vegnan frequentads a Passugg ed il terz semester a Losanna.

-

La setgentaria da charn a Curaglia po vegnir engrondida
La regenza ha approvà la revisiun parziala da la planisaziun locala concludida da la vischnanca da Medel (Lucmagn) ils 17 da matg 2018. Quai pussibilitescha ad ina setgentaria da charn a Curaglia d'engrondir ses manaschi sco planisà. Actualmain è la parcella, sin la quala sa chatta la setgentaria da charn, en trais differentas zonas. Cun l'approvaziun dal project da la planisaziun d'utilisaziun vegn quest territori transferì cumplettamain en ina zona d'abitar e da mastergn 2. Ordaifer questa zona na fissi betg admess d'engrondir il manaschi.

-
©Comet Photoshopping ScRL / Dieter Enz


Gremi: regenza
Funtauna: rg chanzlia chantunala dal Grischun
Neuer Artikel