A chaschun da l'emprim inscunter da la regenza grischuna cun il cusseglier federal Ignazio Cassis èn stadas en il center dumondas davart la lingua rumantscha e taliana. Il dialog politic cun il minister da l'exteriur ha plinavant permess da sclerir differents giavischs dal chantun Grischun e d'approfundar temas transcunfinals.
Il cusseglier federal Ignazio Cassis ha lantschà in dialog politic regular cun il Grischun e cun il Tessin. Suenter in emprim inscunter cun represchentantas e represchentants dal chantun Tessin il mars 2018 ha gì lieu oz l'emprim inscunter cun la regenza grischuna, per discutar ils giavischs e las sfidas particularas dal chantun triling e per rinforzar il barat d'infurmaziuns tranter il cussegl federal e la regenza.
Mantegnair e promover la plurilinguitad
In dals temas principals a chaschun da l'emprima sesida en la sala da la regenza a Cuira èn stadas ulteriuras mesiras per mantegnair e promover la lingua e cultura rumantscha e taliana en il Grischun ed en Svizra. In ulteriur tema da l'inscunter è stada la collavuraziun transcunfinala cun l'Italia en la Val Müstair ed en l'Engiadin'ota pertutgant il sectur da la politica da sanadad.
Contracts bilaterals ed impurtanza da la forza idraulica
Il cusseglier federal Ignazio Cassis ha ultra da quai declerà il stadi actual concernent la cunvegna da basa cun l'Uniun europeica (UE). Plinavant èn vegnidas discutadas l'execuziun da las mesiras accumpagnantas en il rom da la cunvegna davart la libra circulaziun da persunas tranter la Svizra e la UE sco er la procedura d'annunziar las plazzas da lavur vacantas introducida en connex cun la realisaziun da l'iniziativa "Cunter l'immigraziun da massa". Ultra da quai ha la regenza profità da l'inscunter per preschentar sin il nivel il pli aut l'impurtanza da la forza idraulica per il chantun Grischun e per la Svizra.
Fotografia agiuntada:
Infurmaziuns:
president da la regenza dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail
Mario.Cavigelli@bvfd.gr.ch
Gremi: regenza
Funtauna: rg chanzlia chantunala