Dals 7 fin ils 9 da settember 2018 ha lieu a Laax il turnier da ballape da la ARGE ALP per persunas cun impediments. Radund 70 sportistas e sportists da las regiuns Baviera, Son Gagl, Tirol dal sid, Tirol e Grischun giogan en sis squadras per la victoria.

Suenter l'onn 2011 a Domat, sa scuntran las sportistas ed ils sportists per la segunda giada en il Grischun per il turnier da ballape tradiziunal. Da bell'aura ha la festa d'avertura lieu venderdi, ils 7 da settember, a las 17.00 sin il prà al Lai grond a Laax. Ils gieus da la runda d'eliminaziun han lieu sonda, ils 8 da settember, da las 10.00 a las 15.15. Dumengia, ils 9 da settember, da las 9.30 a las 11.45, vegn giugà per la victoria definitiva.

Grond success da las concurrenzas da sport en ils pajais da las Alps
Las concurrenzas da sport annualas da la ARGE ALP èn fitg popularas. Il project curunà da success vegn manà da l'uffizi per la scola populara ed il sport dal chantun Grischun. Las concurrenzas han lieu decentralmain en ils pajais commembers da la ARGE ALP. Pervia dal grond success dal project è la conferenza da las scheffas e dals schefs da las regenzas da la ARGE ALP s'exprimida l'onn 2017 a favur d'ina cuntinuaziun da las concurrenzas fin l'onn 2022. Ils gieus d'enviern cumpiglian mintgamai ski alpin, hockey sin glatsch e patinadi artistic. Durant il semester da stad suondan ballape, in turnier da ballape per persunas cun impediments, tir da sport, atletica leva, cursa d'orientaziun sco er raiver sportiv.

La cuminanza da lavur da las regiuns alpinas
La ARGE ALP ha l'intent d'approfundar la conscienza dad esser responsabel per il spazi da viver alpin e da sviluppar vinavant questa conscienza en moda persistenta per il bain da las abitantas e dals abitants. A la cuminanza da lavur, ch'è vegnida fundada l'onn 1972 en il Tirol, appartegnan diesch pajais federativs, regiuns e chantuns da quatter stadis. Commembers èn ils chantuns svizzers Grischun, Son Gagl e Tessin, ils pajais federativs austriacs Salzburg, Tirol e Vorarlberg, il pajais federativ tudestg Baviera sco er las regiuns talianas Tirol dal Sid, Trentino e Lumbardia. Presidiada vegn la ARGE ALP mintgamai per in onn d'in da ses commembers. Actualmain è quai il Tirol dal sid.

Ulteriuras infurmaziuns sut: www.argealp-sport.org

Fotografia agiuntada:

Infurmaziuns:
Beat Tschalèr, uffizi per la scola populara ed il sport, graubündenSPORT, tel. 081 257 27 56, e-mail Beat.Tschaler@avs.gr.ch


Gremi: uffizi per la scola populara ed il sport
Funtauna: rg uffizi per la scola populara ed il sport