Navigation

Inhaltsbereich

Communicaziun da la regenza dals 13 da settember 2018

  • Erste Mitteilung
  • Neuen Beitrag einfügen
La regenza ha dà glisch verda per ina nova senda da viandar per lung da la via istorica dal pass dal San Bernardin. Ultra da quai ha ella fixà las contribuziuns per il traffic public sco er ils custs per la tgira d'uffants cumplementara a la famiglia.

Nova senda da viandar per lung da la via istorica dal pass dal San Bernardin
La regenza ha approvà la revisiun parziala da la planisaziun locala, concludida da la vischnanca da Valragn ils 6 d'avrigl 2018. Tras questa revisiun vegnan las sendas da viandar en il territori "Dürrabüel" sco er davent da la plazza da tir da Valragn fin a la "Läntalücke" determinadas en il plan general d'avertura.
La senda da viandar planisada "Dürrabüel" è vegnida determinada per remplazzar il trassé vertent, per part malsegir, sin la via dal pass dal San Bernardin. Il trassé da la nova senda sa chatta en il sectur da la via da communicaziun istorica d'impurtanza naziunala cun substanza degna da vegnir protegida. Per lung da la nova senda è ultra da quai previs in fuclar cun susta.
Plinavant vegnan determinadas en il plan general d'avertura duas sendas da viandar alpinas: davent da la plazza da tir da Valragn sur il "Höhberggletscher" fin sut la "Canallücka" sco er davent da la chamona da Zapport fin a la "Läntalücke". Tuts dus trajects existan gia e vegnan actualisads en il plan general d'avertura.

-
Senda da viandar planisada per lung da la via istorica dal pass dal San Bernardin
©Uffizi federal da topografia

La regenza ha fixà la tariffa da contribuziun per purschidas da la tgira d'uffants cumplementara a la famiglia
Tut tenor ils basegns individuals stattan a disposiziun ad uffants da la vegliadetgna prescolara – sco furmas da tgira – canortas, uniuns da geniturs da di sco er geniturs da di privats. Questas structuras da tgira vegnan finanziadas tras contribuziuns dals geniturs, tras donaziuns sco er tras las contribuziuns dal chantun e da las vischnancas. La regenza fixescha mintga onn ils custs normads e la tariffa da contribuziun dal chantun per purschidas da la tgira d'uffants cumplementara a la famiglia.
La calculaziun dals custs normads 2019 n'ha chaschunà naginas midadas vi da la media da la tariffa dals custs normads; quella resta tar 9,05 francs per ura da tgira ed uffant. La tariffa da contribuziun per novas purschidas importa durant ils emprims 3 onns 25 pertschient dals custs normads. Per tut las ulteriuras purschidas importa la tariffa 20 pertschient. Qua tras resulta l'onn 2019 in sustegn finanzial dal chantun da totalmain circa 3,36 milliuns francs per la tgira d'uffants cumplementara a la famiglia. Las vischnancas sustegnan las purschidas cun la medema summa. La planisaziun dal basegn 2019 da las vischnancas fa quint cun var 690 plazzas per la tgira d'uffants cumplementara a la famiglia.

Fixà las contribuziuns per il traffic public

Per l'onn d'urari 2018 importan ils custs totals betg cuvrids per il traffic public en il chantun Grischun previsiblamain var 140,5 milliuns francs; da quels surpiglia la confederaziun tut en tut var 103 milliuns francs u 73 pertschient.
Dals 140,5 milliuns francs betg cuvrids èn 134,7 milliuns francs d'attribuir a la sparta traffic da persunas e 5,8 milliuns francs a la sparta traffic da rauba. En questas cifras è cuntegnida la quota chantunala 2018 da 123 518 269 francs che la confederaziun ha fixà per il Grischun per il traffic regiunal da persunas (TRP). Vi da quest import sto il chantun pajar ina quota da 20 pertschient, quai che correspunda ad ina contribuziun da 24,7 milliuns francs. Il chantun emposta ultra da quai (per part er sco mesira per promover il traffic public) prestaziuns supplementaras en il traffic da persunas (inclusiv consorzis tariffars) en la dimensiun dad 11,2 milliuns francs, che na vegnan betg cofinanziads da la confederaziun. Ensemen cun ils 1,6 milliuns francs per il manaschi dal traffic da rauba che sto vegnir finanzià ensemen cun la confederaziun, resulta pia ina contribuziun chantunala da totalmain 37,5 milliuns francs per l'onn 2018.


Gremi: regenza
Funtauna: rg chanzlia chantunala dal Grischun
Neuer Artikel