Zum Seiteninhalt

Bigliets exclusivs per il Grischun per la Fête des Vignerons en la gronda arena

Ils 23 da fanadur 2019 è il Grischun chantun ospitant da la Fête des Vignerons a Vevey. A partir dad oz pon las Grischunas ed ils Grischuns retrair bigliets exclusivs per ils gieus festivs che han lieu en l'arena durant il di grischun da la festa tradiziunala da la vendemia.

Differentas represchentaziuns da furmaziuns respectivamain d'artistas e d'artists dal Grischun en la citad veglia da Vevey vegnan a dar la tempra al di chantunal grischun. Questas preschentaziuns culturalas dal Grischun che uneschan tradiziun e moderna pon tut las visitadras e tut ils visitaders da la festa frequentar gratuitamain e durant tut il di. La visita da la Fête des Vignerons durant il di grischun po vegnir cumbinada cun la visita dals gieus festivs en l'arena.

Ina festa populara unica
La Fête des Vignerons ha lieu dals 18 da fanadur fin ils 11 d'avust 2019 ed è ina festa da la vendemia cun il caracter d'ina festa populara. Ella ha lieu mo ina giada per generaziun – l'ultima giada l'onn 1999 – e tutga tar il patrimoni cultural immaterial da la UNESCO. En ina gronda arena per 20 000 aspectaturas ed aspectaturs sin la plazza da martgà da Vevey vegnan mussadas en choreografias ed en paradas impressiunantas la vita e la lavur dals viticulturs.

In contingent da bigliets exclusiv per il Grischun
Per che uschè bleras Grischunas ed uschè blers Grischuns sco pussaivel che van a lur di chantunal, possian er giudair il spectacul en l'arena, han ils organisaturs reservà in contingent da bigliets limità per la populaziun grischuna interessada. Ils bigliets correspundents pon ins cumprar a partir dad oz a las 11.00, fin il cumenzament da november 2018 exclusivamain sut il suandant link:
https://starticket.ch/fevi-gr

Ulteriuras infurmaziuns davart la festa e davart la vendita generala da bigliets èn disponiblas qua: https://www.fetedesvignerons.ch/

Agiunta:
Documents da pressa davart la Fête des Vignerons

Fotografia:
-
Vista sin l'arena 2019 (rendering)
©Fête des Vignerons 2019


Infurmaziuns:
Bruno Caduff, manader da project departament d'economia publica e fatgs socials, tel. 081 257 23 13, e-mail Bruno.Caduff@dvs.gr.ch


Gremi: departament d'economia publica e fatgs socials
Funtauna: rg departament d'economia publica e fatgs socials