Navigation

Inhaltsbereich

  • Erste Mitteilung
  • Neuen Beitrag einfügen
Durant l'onn current hai dà in'ulteriura reducziun dal dumber da requirentas e requirents d'asil ch'èn vegnids attribuids da nov al chantun Grischun. Tras la realisaziun da la restructuraziun dals fatgs d'asil sin plaun federal a partir dal mars 2019 vegnan ils chantuns ultra da quai a stuair collocar damain requirentas e requirents d'asil. Perquai adattescha il chantun sias structuras da collocaziun e d'assistenza als novs basegns.

In emprim pass per s'adattar als novs basegns è vegnì fatg la primavaira passada tras la desditga dal contract da locaziun per l'immobiglia Schiabach a Tavau. Per la fin d'october suonda ussa la terminaziun da l'incarica da prestaziun cun il gestiunari da l'alloschi da gruppas a Valchava. Pervia da la diminuziun dal basegn da plazzas da collocaziun vegn serrà en il decurs da l'emprim quartal da l'onn 2019 il manaschi dal center da transit Pratigiana a Spleia, ch'era vegnì avert il mars 2017. Questa immobiglia vegn a star a disposiziun suenter la serrada sco reserva e po puspè vegnir prendida en funcziun a curta vista en cas da basegn. Plinavant ha il chantun desditg per la fin da settember 2019 il contract da locaziun per l'immobiglia Löwenberg a Schluein, ch'è vegnida duvrada dapi l'onn 1989 sco center da transit.

Pertutgads da las serradas dals manaschis èn set collavuraturas e collavuraturs d'assistenza sco er tschintg persunas d'instrucziun. A las collavuraturas ed als collavuraturs pertutgads da l'uffizi da migraziun e da dretg civil vegnan purschidas – uschenavant sco pussaivel – plazzas en auters lieus en il rom da fluctuaziuns natiralas.

Fin a la fin d'avust èn vegnids attribuids al chantun 223 novas requirentas e novs requirents d'asil. Il dumber da novas attribuziuns è sa reducì cuntinuadamain dapi il punct culminant l'onn 2015, cur ch'i eran vegnids attribuids al chantun anc 1121 requirentas e requirents d'asil. Pervia da las cifras d'attribuziun pli pitschnas è il dumber da persunas dal sectur d'asil ch'èn collocadas en alloschis collectivs chantunals, sa reducì per var 100 persunas a 726 persunas dapi l'ultim quartal da l'onn passà. Ils centers collectivs che vegnan manads actualmain per collocar persunas dal sectur d'asil, èn occupads per il mument per var 73 pertschient. Il chantun maina er vinavant in center per l'emprima registraziun a Cuira, in center da partenza a Valzeina (vischnanca da Grüsch) ed alloschis collectivs sco centers da transit en las vischnancas d'Arosa, Cazas, Laax, Mustér, Tavau e Trimmis.

Il chantun engrazia a las vischnancas pertutgadas per la fitg buna collavuraziun.


Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
- Marcel Suter, manader da l'uffizi da migraziun e da dretg civil, tel. 079 331 66 62, e-mail Marcel.Suter@afm.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel