Navigation

Inhaltsbereich

  • Erste Mitteilung
  • Neuen Beitrag einfügen
Las lavurs da construcziun per il nov center administrativ "sinergia" a Cuira s'avanzan tenor plan. La construcziun brutta è terminada e las lavurs a l'intern progredeschan, uschia ch'i vegn celebrada oz la festa da ventschida. En 18 mais, la primavaira 2020, vegn avert il nov center administrativ ed uschia terminada l'emprima etappa da "sinergia".

En preschientscha da var 200 mastergnants participads, dals planisaders e da las persunas participadas al project vegn celebrada la festa tradiziunala da ventschida sin il plazzal. Questa occurrenza ha lieu mintgamai uschespert che la construcziun brutta d'in edifizi è terminada ed uschespert che la tetgaglia è construida respectivamain ch'il tetg è fatg. Grazia al sustegn efficazi ed a la buna collavuraziun da tut ils mastergnants è la construcziun s'avanzada enfin ussa senza incaps ed entaifer ils termins previs.

L'execuziun progredescha tenor plan

Las lavurs da stgavament per il fossal dal center administrativ chantunal han cumenzà il mars 2017. La construcziun brutta è vegnida terminada la fin da fanadur 2018. Dapi la primavaira 2018 vegnan fatgas las installaziuns da la tecnica da chasa e las lavurs a l'intern sin ils plauns sutterrans. Actualmain vegnan montadas las fanestras da lain e metal sco er la fatschada da l'edifizi. Tut las lavurs da construcziun vegnan ad esser terminadas fin la fin da l'onn 2019. La primavaira 2020, suenter las collaudaziuns e suenter ils tests integrals, po vegnir retratg l'edifizi.

Planisà e realisà vegn il project da construcziun dal team da planisaders generals Implenia Svizra SA / Dieter Jüngling + Andreas Hagmann, architects da Cuira. La realisaziun da l'edifizi en standard da Minergie-P-Eco permetta da construir en moda energeticamain effizienta e schanegiond las resursas. Ils custs importan tut en tut circa 72 milliuns francs. Per quest project da construcziun ch'è impurtant per l'economia regiunala, han gì lieu submissiuns publicas. La construcziun brutta, la tecnica da chasa e las lavurs a l'intern èn vegnidas surdadas per gronda part ad interpresas localas.

Plazzas da lavur modernas ed organisaziun da la lavur a partir da l'onn 2020
Tut en tut 14 differentas unitads d'organisaziun (dus departaments e 12 posts da servetsch) vegnan a sa chasar en il nov edifizi administrativ "sinergia". Las 400 plazzas da lavur vegnan realisadas per gronda part cun structuras spazialas avertas (open space, multi space) tenor las enconuschientschas las pli novas areguard l'acustica, areguard l'utilisaziun dal cler dal di ed areguard l'organisaziun da la lavur. Cumplettadas vegnan quellas cun zonas d'inscunter, cun locals centrals e cun zonas da servetsch. L'organisaziun dal plan orizontal ed il palantschieu dubel permettan ina gronda flexibilitad spaziala e pussibiliteschan midadas futuras. Las tecnologias d'infurmaziun pon vegnir adattadas senza problems al stadi da la tecnica. Ils vehichels dals posts da servetsch vegnan remplazzads tras in pool da vehichels che vegn a sa cumponer tant sco pussaivel da vehichels electrics. Medemamain vegnan mess a disposiziun a las collavuraturas ed als collavuraturs e-bikes e velos per viadis da lavur entaifer la citad da Cuira.

La strategia chantunala d'immobiglias prevesa centers regiunals ferms
La realisaziun dal center administrativ "sinergia" a Cuira fa part da la strategia chantunala d'immobiglias. Quella prevesa d'installar totalmain nov centers regiunals ch'èn repartids en tut il chantun. Tras la concentraziun e tras standards moderns per las localitads èsi pussaivel d'augmentar il niz per la clientella e da reducir en moda durabla las surfatschas ed ils custs. A Glion, Roveredo, Tusaun, Tavau, Scuol e Landquart ha il chantun gia reunì cun success l'administraziun. Ulteriurs centers administrativs vegnan realisads a Samedan ed a Puschlav.

Realisaziun dal project "sinergia" en etappas
Il concept da realisaziun "sinergia" ch'è planisà per il lieu d'administraziun Cuira, prevesa da spustar tut en tut 670 plazzas da lavur a Cuira vest e duai succeder en duas etappas separadas. En l'emprima etappa da realisaziun vegnan ussa las unitads d'organisaziun che han il pli grond basegn d'agir, dischlocadas en il nov edifizi administrativ a la Ringstrasse / Salvatorenstrasse cun var 400 plazzas da lavur. En ina segunda etappa che sto puspè vegnir suttamessa al parlament ed al pievel avant ch'ella po vegnir realisada, duain vegnir endrizzadas 270 ulteriuras plazzas da lavur.
Il project "sinergia" na chaschuna nagin augment dal dumber total da collavuraturas e collavuraturs da l'administraziun chantunala, ed i na vegnan er betg dischlocadas plazzas da lavur dals ulteriurs centers regiunals en la chapitala chantunala.

Ulteriuras infurmaziuns:
https://www.gr.ch/RM/instituziuns/administraziun/bvfd/hba/planen-bauen/projekte/Seiten/sinergia.aspx


Agiuntas:
- flyer d'infurmaziun davart la construcziun
- flyer davart la cultura e l'organisaziun da la lavur
- fotografias actualas da la construcziun / rendering da las lavurs a l'intern


Infurmaziuns:
- president da la regenza dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- Markus Dünner, architect chantunal, uffizi da construcziun auta, tel. 081 257 36 31, e-mail Markus.Duenner@hba.gr.ch


Gremi: departament da construcziun, traffic e selvicultura
Funtauna: rg departament da construcziun, traffic e selvicultura
Neuer Artikel

Registraziuns da video da "sinergia" fatgas da dronas