Navigation

Inhaltsbereich

Communicaziun da la regenza dals 25 d'october 2018

  • Erste Mitteilung
  • Neuen Beitrag einfügen
La regenza è s'exprimida cunter ina midada en la finanziaziun da la tgira ed ha elegì Jon Domenic Parolini en il "Comitato direttivo" dal "Forum per l'italiano in Svizzera".

La regenza refusa per gronda part las midadas en la finanziaziun da la tgira
La regenza ha prendì posiziun tar la midada da l'ordinaziun federala davart las prestaziuns da l'assicuranza obligatorica per la tgira da malsauns (OPM). La regenza refusa la midada proponida che las chasas da tgira duain survegnir contribuziuns pli autas, la spitex e las tgirunzas diplomadas ed ils tgirunzs diplomads che lavuran sin agen quint percunter contribuziuns pli bassas da l'assicuranza obligatorica per la tgira da malsauns. Il rapport final davart la reordinaziun da la finanziaziun da la tgira (RFT) mussa ch'ils chantuns e las vischnancas portan ina gronda chargia finanziala supplementara e ch'ils chantuns e las vischnancas han augmentà permanentamain lur contribuziuns a las chasas da tgira ed a las organisaziuns da la spitex en ils onns suenter la RTF. La quota da finanziaziun dals chantuns e da las vischnancas vegn a crescher vinavant, sche naginas cuntramesiras na vegnan prendidas. I n'è betg acceptabel ch'ils chantuns e las vischnancas portan a 100 pertschient l'augment dals custs da la tgira. La regenza surpiglia perquai la posiziun da la conferenza svizra da las directuras e dals directurs chantunals da sanadad dals 27 d'avust 2018.
Ulteriuras midadas en l'ordinaziun concernan l'eruida dal basegn e las pretensiuns minimalas als sistems per eruir il basegn da tgira. Questas adattaziuns approvescha la regenza da princip. Ma ella refusa resolutamain il termin dal 1. da fanadur 2019 per metter en vigur la OPM. L'entrada en vigur durant l'onn chaschuna lavur sproporziunada per ils posts chantunals responsabels e n'è betg pratitgabla.

Consultaziuns dal departament federal da l'intern


Jon Domenic Parolini da nov en il "Comitato direttivo" dal "Forum per l'italiano in Svizzera"
La regenza ha elegì dr. Jon Domenic Parolini, il nov schef dal departament d'educaziun, cultura e protecziun da l'ambient, sco represchentant dal chantun Grischun en il "Comitato direttivo" dal "Forum per l'italiano in Svizzera" a partir dal 1. da schaner 2019. Actualmain vegn questa posiziun occupada dal cusseglier guvernativ Martin Jäger. Perquai ch'el banduna la regenza grischuna, vegn er sia activitad en la suprastanza dal "Forum per l'italiano in Svizzera" ad ir a fin per la fin da l'onn 2018. Il Forum ha la finamira da rinforzar cun stentas cuminaivlas la posiziun dal talian en la Svizra quadrilingua.


Gremi: regenza
Funtauna: rg chanzlia chantunala dal Grischun
Neuer Artikel