Navigation

Inhaltsbereich

Undrar e sustegnair las persunas che tgiran lur confamigliars

  • Erste Mitteilung
  • Neuen Beitrag einfügen
Plirs millis Grischunas e Grischuns tgiran lur confamigliars malsauns. Ellas ed els n'èn betg mo pitgas impurtantas emoziunalmain per las persunas pertutgadas, mabain distgargian er considerablamain il sectur da sanadad en reguard finanzial e persunal. Mintgamai ils 30 d'october vegn festivà en Svizra il "Di da las persunas che tgiran lur confamigliars".

Sco en tut la Svizra han lieu er en il chantun Grischun differentas occurrenzas per undrar la lavur preziusa da las persunas parentas. Ultra da quai ha il departament da giustia, segirezza e sanadad decidì d'elavurar in plan d'acziun per distgargiar persunas che assistan e tgiran lur confamigliars.

Element impurtant dal provediment da la sanadad

Persunas parentas prestan lavurs d'assistenza e da tgira durant bleras uras. Ellas sustegnan ils confamigliars malsauns psichicamain e socialmain, als gidan en il tegnairchasa, fan cumpras ed organiseschan transports. Quest sustegn è essenzial per ch'ina persuna malsauna possia restar uschè ditg sco pussaivel a chasa. Perquai ch'ils umans vegnan pli e pli vegls, èsi impurtant da garantir l'assistenza da persunas che basegnan tgira. Quai è ina gronda sfida per il provediment da la sanadad.

Gronda chargia per las persunas parentas
Ma la chargia è gronda: Las persunas che assistan e tgiran lur confamigliars han savens sezzas in'activitad da gudogn. Tgirar confamigliars e pratitgar ina professiun il medem mument è ina sfida immensa. Quai è in spagat tranter la famiglia, la professiun e la tgira. Il pensum da lavur surpassa savens per bler 42 uras per emna. Ultra dal temp da preschientscha èn las persunas che tgiran lur confamigliars exponidas er ad ina squitsch social respectivamain ad aspectativas. Plinavant resultan savens problems finanzials e la perdita da la plazza da lavur pudess schizunt smanatschar. Las grevezzas corporalas, finanzialas ed emoziunalas per persunas che assistan e tgiran lur confamigliars pon avair effects negativs sin la sanadad.

Sin l'agenda politica
Il tema survegn tant tar la confederaziun sco er en il chantun Grischun pli e pli paisa e stat sin l'agenda politica. Ussa ha il departament da giustia, segirezza e sanadad incumbensà l'uffizi da sanadad da prender per mauns las lavurs per elavurar in plan d'acziun per sustegnair e per distgargiar las persunas che tgiran lur confamigliars.

Discussiun al podium a Cuira
Er las organisaziuns spezialisadas s'occupan intensivamain dal "Di da las persunas che tgiran lur confamigliars". Quellas envidan oz suentermezdi a partir da las 15.00 ad ina discussiun al podium en l'hotel Chur. La runda da discussiun che consista da persunas pertutgadas, da la politica e da l'economia tracta là las sfidas quotidianas da la tgira e da l'assistenza a chasa.


Infurmaziuns:
Rudolf Leuthold, manader da l'uffizi da sanadad, tel. 081 257 26 41, e-mail Rudolf.Leuthold@san.gr.ch


Gremi: uffizi da sanadad
Funtauna: rg uffizi da sanadad
Neuer Artikel