Navigaziun principala

Cuntegn da la pagina

Nova colliaziun dal Grischun fin a l'eroport da Turitg senza stuair midar tren

  • Erste Mitteilung
  • Neuen Beitrag einfügen
Cun la midada da l'urari survegn il Grischun a partir dals 9 da december 2018 ina nova colliaziun directa IR che va mintg'ura da Cuira sur Son Gagl e Winterthur fin a l'eroport da Turitg. Ulteriuras amplificaziuns impurtantas da l'urari concernan curs supplementars sin la lingia da l'auto da posta Cuira – Bellinzona, ina colliaziun supplementara da la Viafier retica a las 19:20 da Landquart en l'Engiadin'ota sco er in pèr supplementar da trens durant la notg sin la S12 tranter Cuira e Sargans.

Viafiers federalas / Thurbo
Da las 06:12 fin las 20:12 mintg'ura da Cuira sur Son Gagl fin a l'eroport da Turitg senza stuair midar tren. Il REX (Rheintalexpress) tranter Cuira e Wil SG survegn dapli valur e daventa il IR13. La purschida da la S12 Sargans – Cuira vegn adattada ed extendida la saira. Da nov circulescha la S12 a las 23:06 ed a las 00:06 da Sargans fin a Cuira sco er a las 23:31 ed a las 00:31 da Cuira fin a Sargans. Percunter scroda la S12 che partiva da Sargans a las 23:36 e da Cuira a las 00:01. Uschia vegnan meglieradas las chadainas da transport da e per la regiun dal Lai Rivaun sco er da e per la Val dal Rain songagliaisa. La sondas e la dumengias curseschan durant la stagiun auta IC supplementars sin il traject Turitg – Cuira.

Viafier retica
A partir da la midada da l'urari vegn prolungada da glindesdi fin venderdi la colliaziun existenta da Landquart a Claustra Plaz en direcziun da l'Engiadin'ota: partenza da Landquart a las 19:20, partenza da Claustra Plaz a las 20:02, arrivada a Samedan a las 21:07. Grazia a questa communicaziun exista per il ICE da Hamburg / Turitg, che parta a las 18:07 da Turitg, ina colliaziun en l'Engiadina bassa.
Tranter Cuira ed Arosa vegnan integrads – durant las fins d'emna d'enviern cun grondas frequenzas – trens spezials en l'urari ordinari. Quels curseschan senza fermar en las staziuns intermediaras da questa lingia: partenza da Cuira a las 08:38, partenza d'Arosa a las 16:18 (las dumengias dals 23-12-2018 fin ils 03-02-2019, las sondas e las dumengias dals 09-02-2019 fin ils 03-03-2019 sco er ils 10-03-2019); partenza da Cuira a las 12:38 – partenza d'Arosa a las 11:18 (las sondas dals 09-02-2019 fin ils 02-03-2019).
Il Bernina express 961/960 circulescha da nov da Landquart sur Tavau fin a Tirano e viceversa: partenza da Landquart a las 08:37, arrivada a Tirano a las 13:33; partenza da Tirano a las 15:13, arrivada a Landquart a las 20:13.
La staziun "Chur Stadt" survegn il nov num "Chur Altstadt", perquai che questa designaziun facilitescha l'orientaziun a persunas che n'enconuschan betg bain il lieu. Er "Seewis-Valzeina" survegn in nov num, numnadamain "Seewis-Pardisla". D'ina vart perquai che la staziun è situada a Pardisla, ina fracziun da Seewis. Da l'autra vart perquai che persunas, che vulan viagiar a Valzeina, bandunan il tren a Grüsch e betg a "Seewis-Valzeina". Da resguardar è la serrada totala dal traject tranter Susch e Scuol-Tarasp dals 11 da mars fin ils 7 da settember 2019. Lura curseschan bus da cumpensaziun tenor in urari spezial. Ulteriuras infurmaziuns chattais Vus online sut www.rhb.ch/unterengadin.
Pervia d'ina adattaziun dal sistem tecnic resultan plinavant a partir dals 9 da december 2018 novas minutas da partenza sin staziuns pli pitschnas da la Viafier retica.

Dapli colliaziuns sin la rait da bus

Dus novs curs da l'auto da posta sin la lingia Cuira – Bellinzona permettan d'arrivar pli baud en il Mesauc / Tessin respectivamain da turnar pli tard a Cuira:
partenza da Cuira a las 06:55, arrivada a Bellinzona a las 08:50; partenza da Bellinzona a las 20:45, arrivada a Cuira a las 22:45.
Sin tut las colliaziuns Cuira – Bellinzona è vegnida stgaffida da nov ina purschida contingentada da bigliets da spargn. Durant la stagiun auta cursescha las sondas en tuttas duas direcziuns in curs "Direttisima" senza fermada tranter Cuira e Bellinzona, cun bunas colliaziuns davent da Bellinzona a Milaun.
En Engiadin'ota vegn stgaffì in nov concept da bus che cumbinescha da nov lingias da bus existentas. Uschia resultan frequenzas pli spessas, tranter auter in tact da 10 minutas tranter San Murezzan Vitg sur San Murezzan Bogn fin a la pendiculara dal Corvatsch.
Ulteriuras amplificaziuns da la purschida èn: per la Bregaglia ina nova colliaziun a bun'ura cun San Murezzan, per la regiun Landquart ina nova colliaziun da bus per l'emprim IC che parta a las 05:19 per Turitg, per la regiun Plaun in nov bus da notg la saira tard fin a Razén, per l'Engiadina bassa in bustaxi fin en la vischnanca da Valsot e.u.v. Bunamain mintga regiun en il chantun profita d'ina pitschna meglieraziun da la purschida. Ils detagls chattan ins sin la glista da las midadas da l'urari 2019.

Tut las midadas da l'urari chattais Vus online sin la pagina www.fahrplanfelder.ch


Infurmaziuns:

Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch


Gremi: uffizi d'energia e da traffic
Funtauna: rg uffizi d'energia e da traffic
Neuer Artikel