Navigation

Inhaltsbereich

Communicaziun da la regenza dals 13 da december 2018

  • Erste Mitteilung
  • Neuen Beitrag einfügen
La regenza ha approvà in grond project da via a Cuira vest sco er ina punt da velos e da peduns a Vaz sut.

Las mesiras per franar ils custs da l'assicuranza per la tgira da malsauns na bastan betg
La regenza ha prendì posiziun tar in project da consultaziun dal Departament federal da l'intern (DFI). La finamira dal project è da franar il svilup dals custs per prestaziuns a donn e cust da l'assicuranza obligatorica per la tgira da malsauns e da limitar uschia l'augment da las premias che las persunas assicuradas pajan. Il project cuntegna differentas mesiras per franar ils custs d'in rapport d'experts ch'èn vegnidas cumplettadas da propostas dal DFI.
Da princip beneventa la regenza la direcziun generala da las mesiras proponidas per franar ils custs. Ma ella è da l'avis che la vista generala sin il sistem manchia. Il project prevesa novas rollas per la confederaziun, per ils chantuns, per las assicuranzas ed er per ils furniturs da prestaziuns. Ord vista da la regenza exista il privel ch'i dettia effects reciprocs betg planisads e betg giavischads cun regulaziuns existentas, ma er cun ulteriurs projects da refurma planisads. In'examinaziun conscienziusa da las consequenzas pussaivlas è perquai indispensabla. Plinavant giuditgescha la regenza tschertas mesiras sco anc memia pauc madiras e strusch efficazias areguard las finamiras dal project. Uschia surpiglia la regenza per gronda part la posiziun da la conferenza svizra da las directuras e dals directurs chantunals da sanadad (CDS) dals 30 d'october 2018.

Posiziun da la CDS
Documents da consultaziun dal DFI

Gronda correcziun da la via a Cuira vest
La regenza ha approvà in project d'exposiziun per curreger la via taliana sin il traject Sommerau fin Plankis. Questa part stretga che vegn duvrada da blers automobilists è en in nausch stadi. Vitiers vegn che vials da velo mancan là. Ultra da quai genereschan la zona d'industria tar la rundella da Favugn sco er l'urari spess da las colliaziuns da bus bler traffic pesant sin quest traject. Plinavant chaschunan ils pendularis bler traffic, oravant tut durant las uras da fulla.
Quests problems duain ussa vegnir schliads cun in project cuminaivel dal chantun Grischun e da la citad da Cuira. La part dal chantun dal project cuntegna oravant tut la renovaziun ed il schlargiament da la via chantunala per ch'il traffic pesant possia sa cruschar senza impediments sco er la construcziun da vials da velo da la vart sco zonas cumprovadas per il traffic betg motorisà.
La part da la citad da Cuira dal project prevesa d'abolir l'access existent a la Triststrasse sco er la fermada dal bus provisorica Sommerau da la vart dal Rain. Il territori "Trist" duai vegnir rendì accessibel da nov cun ina rundella e la fermada dal bus duai vegnir spustada e construida da nov uschia ch'ella tegna quint da las persunas cun impediments. Cun ina rundella èsi plinavant planisà da render pli segira l'entrada e la sortida da Plankis sco er da midar las plazzas da fermada dal bus Plankis uschia ch'ellas tegnan medemamain quint da las persunas cun impediments. Ils custs totals vegnan calculads cun 11 milliuns francs. Da quels surpiglia il chantun circa 3,5 milliuns francs per sia part dal project.

Nova punt da velos e da peduns a Vaz sut
L'uffizi federal da vias (UVIAS) construescha actualmain da nov la colliaziun traversala tranter Zizers e Vaz sut. L'element central da quest project è ina punt nova sur l'autostrada cun in vial da velo da tuttas duas varts. En il rom da questa construcziun nova duai ussa – sin giavisch da tuttas duas vischnancas da Trimmis e da Vaz sut – er vegnir midada la punt dal Rain, per ch'ina colliaziun confortabla e segira per il traffic betg motorisà possia vegnir garantida fin a Vaz sut.
Perquai ha la regenza approvà in project d'exposiziun correspundent ed ha deliberà ina contribuziun chantunala dad 853 000 francs. Il project prevesa da manar il traffic betg motorisà sur ina passarella che sa porta sezza, ch'è fixada vi da la nova punt dal Rain e ch'è colliada cun la via da velos naziunala. Da l'autra vart da la riva duai il vial per velos vegnir collià cun ina storta S e sur ina rampa cun il Polenlöserweg che passa là.
 
-

Gremi: regenza
Funtauna: rg chanzlia chantunala dal Grischun
Neuer Artikel