Navigation

Inhaltsbereich

  • Erste Mitteilung
  • Neuen Beitrag einfügen
La regenza vul cuvrir il chantun Grischun cun internet ultrasvelt. Las regiuns da noss chantun duain daventar pli attractivas per l'economia locala e disponer d'ina avertura equivalenta sco las grondas aglomeraziuns svizras. Uschia vul il chantun Grischun surpigliar ina plazza a la testa en la cumparegliaziun naziunala dal provediment cun colliaziuns da bindel ultralad.

In'avertura cumpetitiva da las regiuns cun colliaziuns da bindel ultralad è ina premissa impurtanta per promover la transfurmaziun digitala en il chantun Grischun. Il basegn da l'economia, dal turissem, da las administraziuns, da las scolas, da las instituziuns da provediment e da las persunas privatas d'avair in'avertura da qualitad s'augmenta cuntinuadamain pervia da las applicaziuns che dovran bleras datas. In'avertura d'internet correspundenta è pia in factur essenzial per il svilup economic da las regiuns sco er per l'attractivitad da l'economia locala.

Promoziun da las infrastructuras a bindel lad

Perquai ha la regenza decidì da promover l'extensiun da las infrastructuras a bindel lad per render accessibels objects ch'èn relevants per il svilup economic sco er per l'augment da la cumpetitivitad e da l'attractivitad da l'economia locala, e quai cun contribuziuns dal credit d'impegn per infrastructuras relevantas per il sistem en la dimensiun da maximalmain 50 pertschient dals custs da construcziun imputabels. Per che l'extensiun cuntanschia ina dimensiun economica critica per activar investiziuns da l'economia privata, ston eventualmain vegnir rendids accessibels ulteriurs objects. A quests custs èn previsas contribuziuns fin maximalmain 25 pertschient.

Per promover l'avertura en las regiuns, conceda il chantun contribuziuns da promoziun or da la nova politica regiunala (NPR) en la dimensiun da maximalmain 50 pertschient dals custs per las lavurs concepziunalas en las regiuns.

Sin fundament da calculaziuns e da stimaziuns ston ins partir d'in basegn da meds da promoziun chantunals en la dimensiun da 35 fin 70 milliuns francs.

La via a l'autostrada da datas

Ensemen cun ina gruppa externa d'expertas e d'experts han il departament d'economia publica e fatgs socials sco er l'uffizi per economia e turissem elavurà in concept da promoziun, cun il qual duain vegnir extendidas las infrastructuras da rait ad in'autostrada da datas. Quest concept mussa, co ch'ils concepts regiunals d'avertura pon vegnir redigids per lura concepir las infrastructuras, e tge prestaziuns da promoziun ch'il chantun po pajar.

L'extensiun da las infrastructuras ha lieu sur las regiuns. Quellas engaschan gruppas regiunalas da coordinaziun e da realisaziun cun represchentantas e represchentants da las autoritads politicas e dals gestiunaris da las infrastructuras regiunalas sco er cun expertas ed experts cumprovads. Questas gruppas regiunalas determineschan, nua ch'i duai avair in'avertura cun colliaziuns da bindel ultralad, evalueschan la realisaziun tecnica ed architectonica e fan in plan da finanzas.

Il chantun engascha ina gruppa chantunala d'expertas e d'experts che sustegna ed accumpogna professiunalmain las regiuns en connex cun questas lavurs. La gruppa chantunala examinescha las propostas e las analisas da la gruppa regiunala areguard lur plausibilitad tecnica ed economica ed areguard la realisabladad. La gruppa chantunala d'expertas e d'experts coordinescha ultra da quai l'avertura surregiunala, integrond las proprietarias ed ils proprietaris actuals da las infrastructuras, eruescha largias d'avertura surregiunalas e procura per la realisaziun d'eventualas mesiras surregiunalas.

Fit en l'avegnir digital

Tras il proceder tenor il concept da promoziun e tras las prestaziuns da promoziun dal chantun duai dar en las regiuns ina concurrenza tranter ils purschiders d'infrastructuras e da servetschs da telecommunicaziun. En il chantun Grischun porta quai in'avertura equivalenta areguard la qualitad ed areguard ils custs sco en las grondas aglomeraziuns svizras. Uschia vegn d'ina vart garantì in internet svelt e favuraivel e da l'autra vart vegn furnida ina contribuziun a la fitness digitala per l'avegnir.

Il concept da promoziun ed ulteriurs documents stattan a disposiziun sin www.dvs.gr.ch > Digitalisaziun.


Infurmaziuns:
cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: regenza
Funtauna: rg departament d'economia publica e fatgs socials
Neuer Artikel