Navigation

Inhaltsbereich

  • Erste Mitteilung
  • Neuen Beitrag einfügen
La regenza ha prendì posiziun davart la nova regulaziun planisada per las contribuziuns federalas a favur da la controlla da l'obligaziun d'annunziar las plazzas libras. Plinavant ha ella tschernì il victur da la concurrenza d'investiders per l'areal dal Sennhof.

La contribuziun pauschala per controllar l'obligaziun d'annunziar las plazzas libras è memia bassa
La regenza ha prendì posiziun tar in project da consultaziun dal departament federal d'economia, furmaziun e retschertga (DEFR). Il project concerna las contribuziuns da la confederaziun a favur dals custs dals chantuns per la controlla da l'obligaziun d'annunziar las plazzas libras. Las patrunas ed ils patruns èn obligads d'annunziar als centers regiunals per intermediaziun da lavur (CIL) tut las plazzas libras da geners da professiuns, nua che la quota da dischoccupaziun cuntanscha u surpassa la valur da sava. La realisaziun da l'obligaziun d'annunziar las plazzas libras è chaussa dals chantuns. En vista al fatg ch'ina applicaziun consequenta da l'obligaziun d'annunziar las plazzas libras è d'impurtanza per l'entira Svizra, vul la confederaziun però surpigliar ina part dals custs da controlla dals chantuns.
Tuttina refusa la regenza il project. Bain sustegna la regenza il princip che la confederaziun sa participeschia als custs cun ina contribuziun pauschala per controlla. L'autezza da la contribuziun pauschala sto dentant vegnir adattada, en spezial perquai ch'ella na resguarda betg ils custs cumplains. Ultra dals custs da salari, inclusiv la contribuziun da las patrunas e dals patruns a las assicuranzas socialas, pretenda la regenza che la confederaziun surpiglia 50 pertschient dals custs d'equipament e d'infrastructura. Consequentamain sto l'autezza da la contribuziun pauschala vegnir calculada da nov. Plinavant deplorescha ella ch'il project na cuntegna nagina basa giuridica per realisar las controllas. Cun ina cumpetenza d'investigaziun correspundenta survegnissan ils organs da controlla per exempel la pussaivladad da controllar en las interpresas a maun d'ina examinaziun dals documents correspundents al lieu, sche las obligaziuns d'annunziar las plazzas libras vegnan observadas. Ord vista da la regenza manca en il project ultra da quai ina disposiziun specifica per barattar datas.

Project da consultaziun dal DEFR

La concurrenza d'investiders per l'areal dal Sennhof è terminada
Cur ch'il stabiliment giudizial serrà Cazas Tignez cumenza cun ses manaschi previsiblamain il cumenzament da l'onn 2020, vegn terminada l'execuziun giudiziala en il Sennhof. Il medem mument duain ils biros da la procura publica a Cuira vegnir unids da nov en localitads a la Rohanstrasse 5. Ils locals concepids aposta per l'execuziun giudiziala en l'areal dal Sennhof na pon betg vegnir duvrads per autras activitads administrativas, uschia ch'els duain vegnir surdads a terzas persunas sin basa d'in dretg da construcziun. La situaziun da l'areal cumplet a l'ur ost da la citad veglia da Cuira è pretensiusa e caracterisada d'in cumplex d'edifizis d'impurtanza istorica. Per satisfar il meglier als interess dal chantun, da la citad da Cuira e da la publicitad ha l'uffizi chantunal da construcziun auta lantschà ina concurrenza d'investiders averta.
Suenter avair examinà las differentas propostas da soluziun ch'èn vegnidas preexaminadas d'in gremi da giudicament, è la regenza arrivada a la conclusiun da far il contract da dretg da construcziun cun il team d'investiders dal project "KONTINUUM". "KONTINUUM" maina vinavant la structura dals edifizis davent dal chantun nord-vest en ina moda persvadenta e s'integrescha armonicamain e ponderadamain en la citad veglia. El mantegna la tur, il tract d'arvieuts ed ils edifizis per lung da la Sennhofstrasse. Grazia a l'angul da la part nova survegn la curt ina nova structura, vegn averta vers la vigna e para d'esser en tut pli generusa. L'idea generala vegn sustegnida da la cumbinaziun multifara e bain structurada da l'utilisaziun cun restaurant, mastergn, abitaziuns, cultura e spazi per studentas e students. L'areal duai ultra da quai esser scumandà per vehichels a motor – cun excepziun da furniziuns – ed accessibel mo per il traffic betg motorisà.

Ulteriuras infurmaziuns sin: Uffizi da construcziun auta dal Grischun

-
Surfatschas da mastergn a pretschs favuraivels pussibiliteschan in'utilisaziun publica dal plaunterren dal Sennhof 

-
La curt interna s'avra vers la vigna e para pervia da quai pli generusa 

Contribuziun chantunala per ils protocols da la Republica da las Trais Lias
La regenza ha concedì ina contribuziun chantunala da 750 000 francs per il project "Protocols da las dietas e dals congress 1567–1797" da la fundaziun da funtaunas da dretg da la societad svizra dals giurists. Quests protocols da las dietas e dals congress èn ils precursurs dals protocols dal cussegl grond e da la regenza da pli tard. I sa tracta da l'inventari serial cumplet il pli impurtant davart l'istorgia grischuna dal temp modern tempriv. Cuntrari a las ediziuns dals ultims decennis, che pertutgavan singulas regiuns da las Trais Lias, vegn quest project a cumpigliar l'entira Republica inclusiv ils territoris subdits.
L'ediziun planisada è in novum en reguard metodic e tecnic. Uschia na vegn betg mo publitgada ina selecziun da funtaunas, mabain l'entir protocol duai vegnir preschentà dal tuttafatg en moda digitala. La fundaziun da funtaunas da dretg ha sviluppà il project en stretga collavuraziun cun l'archiv dal stadi dal Grischun e cun l'institut grischun per la perscrutaziun da la cultura. Ils custs totals dal project importan circa 1,14 milliuns francs.

-
 
Il Grischun e Glaruna partan incumbensas da la surveglianza dal stadi civil
La regenza ha approvà la cunvegna tranter ils chantuns Glaruna e Grischun concernent la collavuraziun en il sectur d'incumbensas da surveglianza en ils fatgs dal stadi civil. Uschia surpiglia l'uffizi da migraziun e da dretg civil dal chantun Grischun per il chantun Glaruna singulas prestaziuns cleramain definidas, ch'il dretg federal attribuescha a las autoritads chantunalas da surveglianza. Al chantun Grischun na vegnan dentant transferidas naginas cumpetenzas suveranas. Anzi, il chantun Glaruna conceda a las collavuraturas ed als collavuraturs responsabels da l'uffizi da migraziun e da dretg civil unicamain l'autorisaziun da suttascriver per pudair sa preschentar sco autoritad da surveglianza glarunaisa en ses num. Tar questas incumbensas tutgan per exempel l'inspecziun, la cussegliaziun ed il sustegn da l'uffizi da stadi civil da Glaruna.


Gremi: regenza
Funtauna: rg chanzlia chantunala dal Grischun
Neuer Artikel