La regenza ha prendì posiziun tar in project federal da consultaziun davart las midadas previsas da las reglas da traffic e da las prescripziuns da la signalisaziun da las vias.

Si e giu cun ils poleschs per novas reglas da traffic
La regenza ha prendì posiziun tar in project da consultaziun dal departament federal per ambient, traffic, energia e communicaziun (DATEC). Quest project duai actualisar il cuntegn da differentas ordinaziuns concernent las reglas da traffic e las prescripziuns davart la signalisaziun da las vias. L'impuls per questa revisiun parziala han dà ils giavischs ils pli novs da differentas gruppas d'interess e diversas pretensiuns d'intervenziuns politicas. L'accent dal project è quel da meglierar la circulaziun dal traffic. Ultra da quai cuntegna il sboz differentas mesiras che sa refereschan al traffic betg motorisà ed als vehichels parcads.
La regenza beneventa per gronda part la midada da las reglas da traffic proponida e da las prescripziuns davart la signalisaziun da las vias. Ma ella refusa d'augmentar la sveltezza maximala sin maximalmain 100 kilometers per ura per autos da persunas levs cun chars annexs. La regenza è da l'avis ch'ina tala adattaziun chaschunia in volumen da traffic pli grond sin il vial sanester da las autostradas, perquai ch'il traffic da camiuns pesants possia per consequenza vegnir surpassà. Uschia ralenteschian quests vehichels supplementarmain la circulaziun dal traffic sin il vial da surpassar.
Plinavant fai senn – ord vista da la regenza – da schluccar il scumond da surpassar a dretga. In'aboliziun generala da quest scumond fiss dentant pli consequenta. Per participantas e participants dal traffic sco er per ils organs da la polizia saja quai difficil da far ina differenza tranter la permissiun da passar sperasvi a dretga ed il scumond da surpassar a dretga.
Medemamain cun in egl critic vesa la regenza la limita da vegliadetgna proponida che limitescha la permissiun da duvrar il passape cun il velo. La vegliadetgna da 12 onns para memia auta a la regenza. Ella propona ina limita fin il 6. onn da vegliadetgna cumplenì. En la vegliadetgna tranter 6 e 12 onns vegnan guidads velos adina pli gronds che pon esser in impediment considerabel per autras persunas che dovran il passape.

Consultaziun dal departament federal per ambient, traffic, energia e communicaziun (DATEC)


Gremi: regenza
Funtauna: rg chanzlia chantunala