Zum Seiteninhalt

Premi da la ARGE ALP 2019 en connex cun la diversitad e cun la plurilinguitad da la giuventetgna

La ARGE ALP appellescha a la giuventetgna da s'occupar da la diversitad e da la plurilinguitad en las Alps cun agid da pleds e da maletgs.

Sut il presidi dal Tirol dal sid publitgescha la cuminanza da lavur da las regiuns alpinas quest onn – suenter ina pausa d'in onn – puspè ina concurrenza cun premis da totalmain 17 500 euros. La concurrenza sa drizza a la giuventetgna en ils stadis commembers. Il tema è la diversitad e la plurilinguitad da la giuventetgna en las Alps. Tschertgadas vegnan istorgias, aventuras u experientschas ch'expriman questa diversitad e che preschentan la plurilinguitad da la giuventetgna en las Alps.

Tge projects vegnan tschertgads?

Giuvenils fin 18 onns, classas da scola u gruppas da giuventetgna che concepeschan ed edeschan gia in'atgna gasetta da scola pon inoltrar fin ils 31 da mars 2019 lur lavurs en las trais categorias print, online/social media e fotografia. La categoria "print" cumpiglia texts redacziunals, en il sectur "online/social media" tutgan contribuziuns d'internet u da blogs ed a la categoria "fotografia" appartegnan fotografias, collaschas da fotografias u reportaschas fotograficas.

Procedura da selecziun

La selecziun ha lieu en dus pass: En mintgin dals diesch stadis commembers da la ARGE ALP eruescha ina giuria regiunala fin la fin da matg ils trais megliers projects da mintga categoria e lingua. Or da quests finalists elegia ina giuria internaziunala lura ils victurs principals. Ils victurs survegnan in premi da mintgamai 2000 euros, ils segunds gudognan mintgamai 1000 euros e per il rang trais datti anc mintgamai 500 euros.

Inoltraziun dals projects
Ils projects grischuns pon vegnir inoltrads fin ils 31 da mars 2019 al servetsch da medias da la chanzlia chantunala (e-mail Tamara.Freuler@staka.gr.ch). A l'annunzia ston ils giuvenils u las commembras ed ils commembers da la redacziun da la gasetta agiuntar ina brev da motivaziun, ina copia digitala da la gasetta, copias dals documents d'identitad da las participantas e dals participants sco er ina decleraziun che las contribuziuns na sajan anc mai vegnidas publitgadas e che tut ils dretgs d'autur sajan sclerids.

La surdada festiva dals premis ha lieu ils 5 da fanadur 2019 a chaschun da la conferenza da las scheffas e dals schefs da las regenzas da la ARGE ALP. Ils premis vegnan consegnads dal parsura actual da l'ARGE ALP, il guvernatur dal Tirol dal sid Arno Kompatscher.

Tut las infurmaziuns chattan ins sin www.argealp.org.


Commembers da l'ARGE ALP èn il stadi liber Baviera (Germania), ils stadis federativs Tirol, Salzburg e Vorarlberg (Austria), las provinzas autonomas Bulsaun-Tirol dal sid e Trento sco er la regiun Lumbardia (Italia) ed ils chantuns Grischun, Son Gagl e Tessin (Svizra).


Infurmaziuns:
Tamara Freuler, incumbensada per l'infurmaziun dal chantun Grischun, tel. 081 257 22 28, e-mail Tamara.Freuler@staka.gr.ch


Gremi: cuminanza da lavur da las regiuns alpinas (ARGE ALP)
Funtauna: rg cuminanza da lavur da las regiuns alpinas (ARGE ALP)