Il chantun Grischun resta ussa definitivamain sin Instagram. Suenter ina fasa da pilot d'in mez onn, ch'è stada curunada da success, introducescha il chantun ussa uffizialmain ses account @kantongr. La purschida existenta da las medias socialas da l'administraziun chantunala cun Facebook, Twitter e Youtube vegn engrondida cun quest chanal plain expressiun visuala.

Tut en tut han 1300 abunentas ed abunents gidà en moda decisiva a far reussir la fasa da pilot cun Instagram. Entaifer mo 6 mais è @kantongr daventà l'account il segund preferì da tut quels dals chantuns. Mo il chantun Basilea-Citad ch'è activ sin Instagram gia dapi l'onn 2016, ha dapli abunentas ed abunents (circa 1500).

Emploiadas ed emploiads giuvens produceschan per ina gruppa en mira giuvna
Cun l'account dad Instagram @kantongr vul il chantun cuntanscher meglier spezialmain burgaisas e burgais giuvens. L'emprova da pilot ha mussà ch'i funcziuna. La gronda part da las abunentas e dals abunents da l'account chantunal dad Instagram è – cun circa 33 pertschient – la gruppa da vegliadetgna da "25 fin 34". En cumparegliaziun cun ils accounts da Facebook e da Twitter da l'administraziun chantunala s'interessan ultra da quai cleramain dapli utilisadras ed utilisaders da 13 fin 25 onns per ils cuntegns publitgads. Circa 17 pertschient da las abunentas e dals abunents tutga tar questa gruppa da vegliadetgna.

Messadi d'amur per in auto da polizia
30 collavuraturas e collavuraturs da 14 uffizis u d'auters posts chantunals han contribuì durant in mez onn 170 messadis, e chattà cun quels bleras reacziuns positivas e bainvulentas. Blers dals messadis ch'èn vegnids publitgads fin ussa mussan d'ina vart nunenconuschenta u almain nunusitada l'administraziun chantunala, sias collavuraturas e ses collavuraturs sco er lur lavur. Uschia ha per exempel chattà il messadi d'amur per in auto da la polizia chantunala sia plazza sin il profil dad Instagram dal chantun. Ils pli blers likes han survegnì ils messadis pertutgant la generaziun giuvna dals lufs dal Calanda e pertutgant la rumida da la naiv sin la via dal pass da la Forcola di Livigno.

Purschida pli gronda
Per pudair producir vinavant regularmain cuntegns confurms a la gruppa en mira vegnan integrads en il process da redacziun spezialmain collavuraturas e collavuraturs giuvens sco er emprendistas ed emprendists da l'administraziun chantunala. Las contribuziuns duain ultra da quai represchentar anc meglier l'entira administraziun. Perquai vegnan agiuntads ussa anc ulteriurs uffizis ed ulteriurs posts chantunals.

Fotografia agiuntada:

Infurmaziuns:
Daniel Spadin, chancelier, chanzlia chantunala, tel. 081 257 22 21, e-mail Daniel.Spadin@staka.gr.ch


Gremi: chanzlia chantunala
Funtauna: rg chanzlia chantunala