Navigation

Inhaltsbereich

  • Erste Mitteilung
  • Neuen Beitrag einfügen
La regenza ha avert la consultaziun tar il sboz per ina revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas).

En il model directiv concernent l'organisaziun dal provediment da la sanadad en il chantun Grischun da l'onn 2013 ha il departament da giustia, segirezza e sanadad preschentà las structuras dal provediment da la sanadad ch'èn necessarias per ch'il chantun disponia er en l'avegnir d'in sistem da provediment da la sanadad che proveda tut las regiuns e ch'è supportabel economicamain. Il model directiv cuntegna in confess al sistem da provediment actual cun ospitals decentrals. Per che quel possia vegnir mantegnì er en il futur, prevesa il model directiv differentas mesiras.

Regiuns da provediment da la sanadad remplazzan las regiuns d'ospital
Cun il sboz qua avant maun d'ina revisiun parziala da la lescha per promover la tgira da persunas malsaunas duain vegnir realisadas sin plaun da la lescha las mesiras cuntegnidas en il model directiv concernent l'organisaziun dal provediment da la sanadad en il chantun Grischun. Correspundentamain cuntegna il sboz la creaziun da regiuns da provediment da la sanadad. La divisiun actuala dal chantun Grischun en regiuns d'ospital vegn extendida per quest intent sin il sectur da las chasas da persunas attempadas e da tgira sco er sin il sectur da la spitex.
En mintga regiun da provediment da la sanadad duain – tenor il sboz da revisiun – las vischnancas appartegnentas constituir ina fundaziun. Ils purtaders dals ospitals, da las chasas da persunas attempadas e da tgira sco er dals servetschs da la tgira ed assistenza a chasa pon alura surdar la gestiun strategica ed operativa a questa fundaziun. En la regiun da provediment da la sanadad Val dal Rain grischuna duain las vischnancas da las subregiuns Plaun, Landquart e Plessur constituir mintgamai ina fundaziun. Las fundaziuns duain vegnir constituidas entaifer 2 onns suenter che la revisiun parziala da la lescha per promover la tgira da persunas malsaunas è entrada en vigur.

Impuls finanzials per surdar la gestiun strategica ed operativa
Ils purtaders dals ospitals, da las chasas da persunas attempadas e da tgira sco er dals servetschs da la tgira ed assistenza a chasa duain vegnir intimads cun impuls finanzials da surdar la gestiun strategica ed operativa da lur manaschis a la fundaziun da lur regiun da provediment da la sanadad. Tschertas contribuziuns chantunalas survegnan ils ospitals ed ils servetschs da spitex mo, sch'els han surdà la gestiun strategica ed operativa a la fundaziun. Las chasas da persunas attempadas e da tgira che n'han betg surdà la gestiun strategica ed operativa a la fundaziun, pon incassar da las abitantas e dals abitants maximalmain 80 pertschient dals custs da pensiun renconuschids da la regenza.

Prescripziuns dal legislatur concernent ils organs da la fundaziun duain – tenor il sboz da revisiun – garantir che las fundaziuns disponian da structuras professiunalas e che las cumpetenzas ch'èn indispensablas per ina gestiun strategica ed operativa effectiva ed effizienta da la fundaziun sajan represchentadas en la suprastanza. Cun la revisiun parziala da la lescha per promover la tgira da persunas malsaunas duai ultra da quai vegnir stgaffida la basa legala per ch'il chantun possia pajar contribuziuns a las regiuns da provediment da la sanadad a projects per la constituziun da la fundaziun e per la surdada da la gestiun strategica ed operativa dals ospitals, da las chasas da persunas attempadas e da tgira e dals servetschs da spitex tras ils purtaders respectivs a la fundaziun.

La consultaziun dura fin ils 30 d'avrigl 2019. Ils documents stattan a disposiziun en l'internet sut www.gr.ch/Consultaziuns currentas.


Infurmaziuns:
cusseglier guvernativ Peter Peyer, schef dal departament da giustia, segirezza e sanadad,  tel. 081 257 25 01, e-mail Peter.Peyer@djsg.gr.ch


Gremi: regenza
Funtauna: rg chanzlia chantunala dal Grischun
Neuer Artikel